Конфликтот во Украина и санкциите против Русија имаат огромно влијание врз светскиот земјоделско-прехранбен сектор.
Украина е најголемиот снабдувач на добиточна храна во светот и еден од четирите најголеми извозници на пченка во светот, наведува порталот Farmer. Сточарите во Јужна Европа стравуваат дека ќе биде неопходно масовно колење на животни, бидејќи залихите со храна се намалуваат. Најпогодени се Шпанија и Италија, кои се познати по месото и млечните производи.
Според податоците од 2021 година, Шпанија има најголем број говеда во цела ЕУ, околу 58,8 милиони грла говеда, свињи, кози и овци. Италија, со над 22,5 милиони грла, е на четвртото место.
Мишел Ливерини, потпретседател на компанијата за добиточна храна Mangimi Liverini SpA, вели дека италијанските пристаништа имаат залихи на сточна храна за уште 25 дена. Ситуацијата дополнително се комплицира поради недостигот на алтернативни извори на увоз, бидејќи Унгарија, Молдавија и Србија го забранија извозот за да ги заштитат своите залихи.
Сточарите и компаниите известуваат дека се соочуваат со голема криза и проблеми при набавка на храна за своите животни. За одржување на фармите ќе биде потребно дел од нив да се заколат и со тоа да се намали нивниот број. Проблемот е што за да се обнови сточниот фонд се потребни години.
Емилио Риал, директор на групацијата Coren – шпанска земјоделска задруга, изјави за Ројтерс дека трошоците за производство на основната храна пораснале за 40 отсто и дека зголемувањето на цените ќе биде неизбежно.
Протести на фармерите во Мадрид
Илјадници шпански фармери вчера учествуваа на демонстрациите во центарот на Мадрид против политиката на владата на Педро Санчез.
Протестот се одржал под слоганот „Заедно за полето“, а учествувале членови на ловечки друштва и сточари. Биле поднесени барања за промена на земјоделската политика што ја спроведува централно-левичарскиот кабинет на Санчез.
Во интервју за новинарите, демонстрантите укажаа на зголемувањето на трошоците за земјоделското производство, како што е наглото поскапување на горивата, како и на пасивноста на владата.
И грчките земјоделци на улиците
Минатиот петок имаше протести во главниот град на Грција, Атина, каде што стотици земјоделски производители на улица побараа дополнителни даночни намалувања и субвенции за борба против високите цени на горивата и ѓубривата, пишува ant1news.
Земјоделците во Грција организираа повеќенеделни протести поради високите цени на енергијата на почетокот на оваа година. Посочуваат дека трошоците им се толку високи што ќе бидат принудени да произведуваат помалку и да ги зголемат цените за потрошувачите.
Извор: agroklub.rs
