Командирот на Територијалната противпожарна единица во Кичево, Горан Соколески испрати апел до жителите на селските населби во регионот да не палат оган на отворен простор, бидејќи штетите може да бидат несогледливи.
Соколески воедно побара и полицијата активно да се вклучи во превентирање на пожарите. Ова барање следи откако во текот на вчерашниот ден во попладневните часови во реонот на селото Зајас, во месноста Сатеска, избувна пожар во кој гореше шума и нискостеблеста вегетација. Пожарот е изгаснат по интервенцијата на ТППЕ Кичево.
-Беше опожарена површина со шума и нискостеблеста вегетација. Територијалната противпожарна единица од Кичево интервенира со едно возило и со тројца пожарникари. Пожарот е целосно изгаснат и допрва ќе се утврдат причините и висината на направената штета. Добро е што при овој пожар нема повредени лица – изјави командирот Соколески.
Извор: МИА
