Јапонската Влада објави дека планира да пушти во морето повеќе од еден милион тони контаминирана вода од уништената нуклеарна централа „Фукушима“, една деценија по хаваријата.
Водата претходно ќе се третира соодветно за да се минимизираат нивоата на зрачење. Сепак, локалното население и пред сè оние кои работат во риболовната индустрија, како и жителите на Кина и Јужна Кореја се против овој план.
Во моментов, радиоактивната вода се прочистува со комплексен процес на филтрација што отстранува поголем дел од радиоактивните елементи, но некои од нив сè уште остануваат.
По филтрацијата, водата се складира во големи резервоари, но проблемот е во тоа што на операторот на електраната, Токио електрик пау ко (TepCo), му снемува простор просторот за собирање на водата. Се очекува резервоарите да бидат пополнети до следната година.
Во резервоарите се наоѓаат 13 милиони тони радиоактивна вода, што е доволно за да се наполнат 500 олимписки базени, пренесува Би-Би-Си.
Испуштањето вода во морето треба да започне за две години, а целиот процес ќе трае со децении.
„Претпоставувајќи строго почитување на регулаторните стандарди кои се утврдени, избравме да испуштаме вода во океанот“, се вели во соопштението на јапонската Влада.
Како што пренесуваат странските агенции, оваа одлука на Јапонија сигурно ќе ги налути соседните земји.
Јужна Кореја веќе изрази „сериозна загриженост дека тоа ќе има директно и индиректно влијание врз безбедноста на луѓето и животната средина“, а Кина смета дека станува збор за многу неодговорен потег. Тајван исто така изрази незадоволство.
Извор: slobodnaevropa
