Црните рибизли се режат во текот на зимското мирување т.е отпаѓањето на лисјата па сè до почетокот на вегетацијата. Во пракса се применуваат две режења: есенско и пролетно, а поретко и летно. Црната рибизла при режењето може да се формира во облик на обична грмушка, вазна или шпалир.
Време на резидба
Есенското режење се практикува на постари грмушки, како и во поголеми насади, бидејќи во нив, поради големината, режењето не би можело да се изврши напролет, зашто црната рибизла многу рано почнува да се разлистува.
Пролетната резидба се изведува во помали насади и тоа многу рано, по можност на почетокот на март.
Летната резидба ретко се применува. Се состои во тоа што на средината на јуни едногодишните стебла се скратуваат за 1/5 – 1/4, поради избивање на младите изданоци, со што се зголемува родноста во наредната година. Оваа резидба дава задоволителни резултати само во некои сорти црна рибизла.
Форми на резидба
Обична грмушка
Ова е најстара, најраширена и воедно најлесна форма на формирање на круната на рибизлата. Во оваа форма се гранките (односно стеблата) во грмушка правилно распоредени на сите страни и заземаат различни положби – од вертикални и коси до сосема хоризонтални.
Вазна
Разликата помеѓу обликот на обична грмушка и вазна се состои во тоа што во вазната редовно се отстрануваат централните гранки (стебла) кои растат нагоре. Ваквата форма на круната во внатрешноста е празна и има изглед на вазна или чаша, по што и го добила името. Оваа форма се препорачува само за места кои не се доволно осветлени.
Форма на шпалир
Кај оваа форма на круната сите гранки се наоѓаат во едно ниво и задолжително се врзуваат за жица. Обично се поставуваат два реда жица: на 40 и 80 см над земјата. Оваа форма на круната се формира од помал број гранки, поради што и помала е продуктивноста, но гроздовите од рибизла се покрупни и поквалитетни. Се применува најчесто во градините, обично покрај ограда, ѕидови, патеки или алеи.
