Боне Спасовски од Виничани: Aко не беше ИПАРД никогаш немаше да можам да ја купам оваа механизација што ја имам сега

За Марина и Боне Спасовски од село Виничани, Општина Градско, сме пишувале повеќе пати. И овој пат имаме навистина убав повод, тие пред само неколку дена добиле известување од Агенцијата за финансиска поддршка на земјоделството, дека нивната апликација за повикот од ИПАРД 2 програмата, Мерка 1 Инвестиции во основни средства на земјоделските стопанства, е одобрена.

–Ова е трет пат како аплицираме за ИПАРД 2 програмата и сите три апликации ни се одобрени. Мојата сопруга Марина, од 2009 година е регистриран земјоделец како носител на нашето семејно земјоделско стопанство и од тогаш па до денес аплицираме за сите повици каде што исполнуваме услови, без разлика дали станува збор за програмата за рурален развој или ИПАРД. Јас цел живот се занимавам со земјоделство, а имав само еден 40 години стар трактор, кој уште го чувам и nишто повеќе. Мислам дека ако не беше ИПАРД никогаш немаше да можам да ја купам оваа механизација што ја имам сега “- вели Боне и задоволно ја покажува својата нова механизација која ја купил веднаш штом го добил одговорот од Агенцијата.

Боне и неговата сопруга Марина заедно со своите деца обработуваат 3 хектари лозје, 7 хектари овоштарство од кои претежно кајсии, сливи и праски, 1,5 хектар житарица и 10 пластеници со раноградинарска култура – пиперка.

За прв пат во 2009 година, добиле помош од програмата за рурален развој и купиле трактор, атомизер и друга мехаизација во вредост од 12 500 евра, потоа од 2016 година се корисници на средства од ИПАРД 2 програмата, па така во 2018 година од мерката Инвестиции во материјални средства на земјоделските стопанства, средствата ги искористиле за набавка на трактор Ландини, Мулчер Риниери и Електрична ножица за режење Риниери во вредност од 1.505.320 ден.

Велат дека главно се задоволни од она што го работат. Дури и во изминатата кризна година поминале добро, бидејќи, како што вели Боне, клучот за успехот е добриот квалитет, а за квалитетните производи секогаш има купувачи па и добра цена.

Годинава се во подготовка да подигат нов насад со круши и веќе засадиле 800 дрвца, а ќе го прошират и лозовиот насад со нови 1000 прачки од сортата Вранец, увезени од Италија. Исто така планираат да подигнат и нови два пластеници со компири.

„Сега чекаме одговор од повикот за Рурална жена , за кој Марина аплицираше минатата година со цел да купиме казан за ракија и машина за мелење грозје. Планираме во наредниот период да направиме и ладилник за чување на овошјето бидејќи ни е неоходен. Секако доколку исполнуваме услови планирам повторно да аплицираме за некој нареден ИПАРД повик, а ќе ги следиме и повиците од програмата за Рурален развој“ – вели Боне.

Фамилијата Спасовски е доказ дека земјоделството е сериозен бизнис во кој треба да се инвестира и да се работи професионално доколку сакате да имате успех и да заработите.

Затоа, земјоделци и агробизнисмени, не бидете скептици и не се откажувајте уште пред да аплицирате. Обратете се до подрачните единици на МЗШВ, советниците од АПРЗ или приватните консултантски фирми кои изработуваат апликации. Користете ги средствата кои се обезбедени за вас!