Летото е период од годината кога се троши помалку месо, но годинава, како резултат на пандемијата на корона вирусот, веќе се чувствуваат сериозни последици на пазарот на овој производ во целиот регион, изјави секретарот на Здружението за сточарство и преработка на добиток во Стопанската комора на Србија Ненад Будимовиќ за „Танјуг“.
Во првите пет месеци од оваа година производството на говедско месо во Србија се зголеми за 11%, на живина за 18%, додека производството на свинско месо се намали за 16% во однос на истиот период лани.
Целиот регион, вели Будимовиќ, се соочува со намалена побарувачка и потрошувачка на месо, затоа што нема туризам во големите градови, нема прослави, не дојдоа луѓето од дијаспората, студентските мензи не работат …
Тој истакна дека производителите на храна, особено оние на основните прехранбени производи, како месото, млекото и јајцата, покажале исклучително високо ниво на организација во производството и со големи напори успеале да обезбедат нормално снабдување на пазарот, без недостатоци.
„Веќе се чувствуваат сериозни последици од намалената потрошувачка, а тоа влијае на зголемувањето на залихите“, вели Будимовиќ.
Во првите пет месеци од оваа година, Србија извезе 2.200 тони говедско месо во вредност од околу 10 милиони евра, од кои 1.300 тони во Турција, 320 тони во Кина, 150 тони во Италија и остатокот во ЦЕФТА.
Во истиот период минатата година, Србија имала извоз од 750 тони замрзнато говедско месо во вредност од 2,9 милиони евра.
Исто така во првите пет месеци од оваа година биле извезени само 210 тони свинско месо во вредност од околу 300.000 евра, од кои околу 120 тони во Кина, а остатокот во ЦЕФТА.
Будимовиќ истекна дека увозот на свинско месо е голем, па затоа производството е помало.
Извозот на полутрајни и трајни производи од месо во истиот период оваа година бил 8.800 тони, во вредност од околу 23 милиони евра.
Годинава немаше увоз на говедско месо, освен мала количина телешко месо, а увезени се 9.200 тони свинско месо во вредност од околу 26,6 милиони евра, како и полутрајни и трајни производи околу 9.000 тони во вредност од околу 23 милиони евра.
Вкупниот увоз на свинско месо и месни производи во првите пет месеци од 2020 година е за околу 43% поголем во однос на истиот период лани, додека извозот е за 41% помал.
Вкупната вредност на увозот е околу 50 милиони евра, а увозниците се претежно трговски ланци, додека извозот вредеше околу 23 милиони евра.
Извор: Agronews
