Водата од кумановскиот водоводен систем е безбедна за пиење, покажуваат досегашните анализи од Центарот за јавно здравје, лабораторијата на филтер-станицата и Институтот за јавно здравје, информира Тони Јовчевски, раководител на Филтер-станицата Куманово. Во услови на летни горештини, од водоснабдувањето велат дека засега нема поголеми нарушувања, но зголемената и нерационална потрошувачка може да предизвика намален притисок во повисоките делови на градот.
-Водата во Куманово се контролира од 11 мерни места, меѓу кои е и Филтер-станицата, а се вршат и периодични, проширени анализи на секои три месеци. Водата од водоводниот систем во Куманово е безбедна за користење според досегашните резултати. Анализите се земаат и од Центарот за јавно здравје, од нашата лабораторија и од Институтот за јавно здравје. Сите анализи досега покажуваат дека водата е безбедна за пиење, вели Јовчевски.
Тој додава дека во одредени временски и други неповолни услови може да дојде до отстапувања во квалитетот, но таква ситуација во моментов нема.
-Имаше невреме во 2024-та водата во браната беше заматена, јавноста беше информирана навреме. Засега, за среќа, немаме таква ситуација. Немаме проблеми ниту со пречистувањето на водата, ниту со потрошувачката на средствата за пречистување. Водата од станицата, како и од Бедиње и Митев Мост, е целосно безбедна за пиење, посочува Јовчевски.
Во однос на резидуалниот хлор, Јовчевски објаснува дека станува збор за хлорот кој се додава по пречистувањето и кој има улога на дополнителна заштита на водата во водоводниот систем.
-Резидуалниот хлор е хлорот кој се додава во водата по пречистувањето и всушност е стражарот на водата за пиење, односно служи како заштита од евентуално секундарно загадување и за уништување на микроорганизмите кои би можеле да бидат присутни во водата, вели Јовчевски.
Количината на резидуалниот хлор на крајните потрошувачки места, како што појаснува, зависи од повеќе фактори, меѓу кои потрошувачката на вода, местото во водоводниот систем и температурата на водата и надворешната температура. Во однос на водоснабдувањето во текот на летото, тој вели дека засега нема поголеми проблеми, иако потрошувачката е зголемена.
-Имајќи предвид дека акумулациите оваа година беа полни, Водостопанство редовно пушта дополнителни количества вода преку бајпас, а се користат и количествата од Митев Мост и Бедиње. Досега немаме забележано поголемо нарушување на водоснабдувањето, вели Јовчевски.
Сепак, во вечерните часови, особено во периодите со најголема потрошувачка, може да се појави намален притисок во повисоките делови на градот. Причина за тоа, според Јовчевски, е нерационалната потрошувачка во пониските делови, од каде што се преземаат големи количества вода, што влијае врз притисокот во повисоките зони.
-Веројатно најголемата причина за ваквите појави е неовластеното користење на водата од системот, односно диви приклучоци кои се користат за наводнување, но и за полнење базени- вели Јовчевски.
Од водоснабдувањето апелираат водата од системот да се користи рационално, особено во периодите на најголема потрошувачка, со цел да се обезбеди стабилен притисок и непречено снабдување за сите корисници.
МИА
