Ковид 19 и сушата, македонските земјоделци пред стартот на пролетната сеидба се борат на два фронта. Ги почитуваат препораките на надлежните и ограничувањето на движење но почнаа и со подготовки за пролетната сеидба.
Последните врнежи од дожд и снег ги ублажија последиците од сушата, но таа се уште претставува голем проблем особено за производителите на ориз. Најголемата брана на истокот, Калиманци, се уште нема доволно вода за да се наводуваат сите предвидени површини. Наредната недела ќе се прави ревизија на планот за наводнување по што ќе се знае колку површини под ориз, но и други култури ќе бидат засеани.
„Во моментов дотокот на вода е од седум до девет кубни метри вода, што е добра количина. Чекаме да видиме колку ќе ја наполни акумулацијата дополнителното топење на снегот, но и очекуваните нови врнежи од дожд. За да се почне наводнителната сезона потребни се од 75 до 80 милиони кубни метри вода“ вели Дени Митров директор на Водостопанство „Брегалница“ – Кочани.
На самиот старт пред сеидбата оризопроизводителите, од регионот на Чешиново-Облешево што 80% егзистира од производство на ориз, се плашат дека нема да има доволно вода за нивите.
Инаку од Обединетите нации предупредија дека вирусот што ги затвори границите може да предизвика и недостиг од свежа храна, овошје и зеленчук. Придонес во тоа имаат и протекционистичките мерки што дел од земјите веќе ги воведоа за забрана на извоз на одредени производи за да ја задоволат домашната побарувачка, но и недостигот на сезонски работници.
Поради дел од мерките земјоделците од најпогодените земји од корона вирусот предупредуваат дека овошјето и зеленчукот ќе скапе на нивите, а во прашање е доведена и пролетната сеидба ако состојбата не се промени. Затоа голем дел од нив го мобилизираат сопственото население како замена за сезонските работници.
Извор – 24 ТВ
