Американската агенција за заштита на фауната „FWS“ објави список на 23 видови животни во исчезнување, а на списокот се најде и белоклунестиот клукајдрвецот, кој официјално не е забележан од 1944-та година.
Листата на исчезнати видови вклучува 11 птици, осум слатководни школки, две риби, лилјак и растение, пренесува BBC.
„Секој од овие 23 видови претставува трајна загуба за природното наследство на нашата нација и глобалниот биодиверзитет. Тоа е отрезнувачки потсетник дека истребувањето е последица на промените на животната средина предизвикани од човекот“, рече за Тајмс Бриџит Фахи, специјалистка за класификација на риби и видови диви животни.
Експертите за диви животни како главен двигател на исчезнувањето на видовите го наведуваат губењето на живеалиштето, обично поради човечките активности. Земјоделството, сечата и рударството одземаат живеалишта од животните, додека загадувањето и ловокрадството исто така ги намалуваат бројките.
Американските владини научници не прогласуваат случајно исчезнување. Често се потребни децении пребарување. Околу половина од видовите во оваа група веќе се сметаа за исчезнати од страна на Меѓународната унија за заштита на природата со седиште во Швајцарија – IUCN, глобален авторитет за статусот на животните и растенијата.
Во случајот на клукајдрвецот, американскиот радио дифузер „Национално јавно радио“ известува дека IUCN не ја става птицата на листата на истребување, бидејќи тие веруваат дека таа сѐ уште постои во делови од Куба.
