Компировиот молец (Phthorimaea operculella) е инсект кој ги оштетува растенијата од семејството Соланацеа и е со потекло од Јужна Америка. Во моментов е присутен во повеќе од 90 земји низ целиот свет.
Создава големи проблеми во Нов Зеланд во близина на градот Пукехоха, познат по одгледувањето компири. Како што пишува Потатоесенз, главната причина се сувите и топли лета и благите зими, што им овозможува на земјоделците да го чуваат овој вид зеленчук на нивите од средината на јануари до април. Меѓутоа, пукнатините во почвата овозможуваат ларвите на молецот да влезат во компирот.
„Органофосфорните пестициди се користеа за заштита на земјоделските култури од овој штетник, но поради прекумерната употреба, лошото влијание врз животната средина и резистентноста, потребни се алтернативи“, рекол Шејн Смит, извршен директор на „Инта-Аг“, кој нуди совети и решенија за производството на зеленчук.
Затоа, оваа компанија тестирала како мулчирањето со слама делува против компировиот молец. Во октомври минатата година на површина од еден хектар околу растенијата ставиле 10 тони малч. На тој начин, велат тие, им поставиле стапици на штетниците. Да потсетиме дека со овој метод на одгледување, поретко се појавува и компировата златица, а оваа техника веќе е широко користена од британските производители.
Помалку плевел, помалку болести и помали трошоци
По мулчирањето забележени се и други позитивни ефекти. Имало помалку плевел, а била подобра контролата на габични заболувања, особено бело гниење (Sclerotinia spp.). Конечните резултати од оваа студија се очекуваат во април или мај по вадење на компирите.
Во однос на потенцијалните трошоци за земјоделците кои сакаат да ги малчираат своите посеви, Шејн рекол дека во голема мера тоа ќе зависи од цената на сламата. Одгледувачот кој го спровел експериментот имал и свој јачмен, па наместо да ја продава, сламата ја користел како мулч за компирот и така ги намалил трошоците.
Општо земено, многумина во Нов Зеланд одгледуваат јачмен како претходна сеидба за кромид, така што овој материјал не би требало да има висока цена, смета тој.
Следната сезона, истражувачите ќе ја прошират експерименталната област на 20 хектари на територијата на две или три различни фарми кои одгледуваат компири. Тие сметаат дека е важно во ова да се вклучат оние на кои се појавува молецот од компири во големи размери. Покрај тоа, ќе се извршат тестови и на други култури кои ќе служат како покривни посеви, како што се леќа, лен, детелина и ротквица.
