Тутунопроизводители од Општина Конче се обратија до Агротим.мк со цел да информираме за моменталната состојба со откупот на тутун односно проблемот со кој се соочиле оваа година.
-Откупот на тутун започна во законски предвидениот датум и во почетокот откупот се одвиваше добро, прва и втора берба одеа со проценка од прва и втора класа, повеќе од добро, но некаде на средината на декември работите се сменија. Горните берби ги проценуваат во втора и трета класа. Ретко кој успеа да го продаде целиот собран род за толку кратко време. Откупени се околу 70 % од тутунот, а тој што не е продаден е најмногу од горните берби, а откупните пунктови почнаа да ги повлекуваат пунктовите. На пример „Сокотаб Битола“ на ниво на општина нема откупен пункт, а има најава за повлекување и на „Алијанса Кавадарци“. Ново е годинава што не се откупува вишокот килограми тутун од потпишаниот договор. На пример ако имаш склучено договор за 100 килограми, не земаат ни 10 килограми повеќе – се пожалија земјоделци од Општина Конче.
Тутунопроизводители за оваа состојба ги информирале во Државниот земјоделски инспекторат кои, според нив, биле излезени на терен на почеток на откупот.
-Од Сојузот на Здружението на тутунари нема никаква реакција, а исто така го запознавме и градоначалникот на Општина Конче. Сега за сега оставени сме сами на себе и бараме помош од надлежните институции – велат во дописот до Агротим, земјоделците од Конче.
