Во пресрет на Самитот на ЕУ, што ќе се одржи во Брисел во четврток и петок, Луксембург ќе биде домаќин на три заседанија на министерски Совети на Унијата.
За денеска е закажана седницата на Советот за надворешни работи, како и почетокот на дводневното заседание на Советот за земјоделство и рибарство.
Како што јави дописникот на МИА од Брисел, на заседанието на Советот за надворешни работи, со кое ќе претседава високиот претставник на ЕУ за надворешна политика и безбедност Жозеп Борел, шефовите на дипломатиите на членките на Унијата ќе расправаат за ситуацијата во Израел и регионот на Блискиот Исток, по „бруталните и неселективни терористички напади на Хамас врз Израел“, како за „настаните што се случуваат во Газа“.
Покрај ова, на Советот ќе се дискутира и за руската агресија врз Украина, со фокус на безбедносните обврски на ЕУ, а ќе бидат разменети мислења и за случувањата поврзани со Ерменија и Азербејџан.
По завршувањето на заседанието, ќе се одржи 20-от состанок на Советот за соработка ЕУ-Казахстан, со кој ќе претседава шпанскиот министер за надворешни работи, ЕУ и соработка, Хозе Мануел Албарес, чија земја е актуелен претседавач со Унијата.
На Советот за земјоделство и рибарство, министрите на членките на ЕУ задолжени за овие два ресори ќе разговараат за влијанието на руската агресија на Украина врз прехранбените производи и земјоделскиот сектор на Унијата. На почетокот на расправата на Советот ќе учествува и украинскиот министер за аграрна политика и храна Микола Солски.
Во продолжение на Советот ќе се дебатира и за предлозите на Европската комисија за измени на Рамковната директива за отпад, во делот поврзан со храната, како и за предложениот план за риболов во Балтичкото Море за следната година.
Министрите ќе разменат мислења и за насоките што ќе и бидат дадени на Европската комисија за позицијата на ЕУ за годишниот состанок на Меѓународната комисија за зачувување на атлантската туна (ИЦЦАТ), што ќе се одржи од 13 до 20 ноември, како и за влијанието на одредбите за ограничување на јаглеродот врз шумарството и земјоделскиот сектор.
Утре, Луксембург ќе биде домаќин и на Советот за општи работи на кој главна тема на претставниците на земјите членки ќе бидат подготовките за претстојниот Самит на ЕУ.
Дополнително, тие ќе ги разгледаат и извештаите за владеењето на правото во Данска, Германија, Естонија, Ирска и Грција, а ќе разменат мислење и за предлогот на Еврокомисијата за мерките за справување со демографските промени во Унијата.
Тема на дневен ред ќе биде и проценката во напредокот поврзан со барањето на Шпанија за прогласување на каталонскиот, баскискиот и галицискиот јазик за службени јазици на ЕУ.
Ден пред Самитот, в среда во Брисел ќе се одржи на Трипартитниот социјален самит на лидерите на институциите на ЕУ со социјалните партнери, со кој ќе копретседаваат претседателите на Европскиот совет и на Европската комисија, Шарл Мишел и Урсула фон дер Лајен.
Според се уште неофицијалниот дневен ред за Самитот на ЕУ, шефовите на држави или влади на членките на Унијата треба да расправаат за настаните на Блискиот Исток поврзани со конфликтот меѓу Израел и Хамас, случувањата околу Украина, за Повеќегодишната финансиска рамка на ЕУ за периодот 2021-2027, за состојбите во европската економија и за прашањата поврзани со миграцијата.
МИА
