Екипи на водостопанство „Кумановско-липковско поле“ почнаа со расчистување на канали во населбата Ајдучка Чешма во Кумановско, соопштија денеска надлежните од претпријатието. Во моментов се работи на површина од петстотини метри.
– Продолжуваме со чистење на каналите во Кумановско. Се надеваме дека во наредниот период ќе успееме да го исполниме планот за чистење, предвиден за во есенскиот период, изјави директорот на подружницата, Оливер Илиевски.
За овој период планирано е да се исчистат каналите во населбите Вера Которка и Карпош и во село Режановце.
Во август заврши чистењето на реката Кумановка на потегот покрај кејот во градот, во должина од петстотини метри од почетокот на крстосницата помеѓу булеварот „Октомвриска револуција“ и „Ѓорче Петров“, како и низводно кон локацијата „Митев Мост“ во должина од 1.200 метри. Претходно, претпријатието ја исчисти реката Којнарка во должина од 3.000 метри.
Во наредниот период, најавија надлежните, ќе се чисти Кумановка сѐ до Проевце, но и одводните канали на подрачјето на општината. Од претпријатието апелираат граѓаните совесно да се однесуваат да не фрлаат смет, шут, ѓубре во речните корита.
МИА
