ЗУР Македонски ракотворби по 17-ти пат ја организира манифестацијата ВО СРЦЕТО НА БИТОЛА на добро познатата локација на Широк Сокак помеѓу „Стопанска банка“ и киното „Манаки“ со учество на ракотворци од целата држава. Како и секогаш, ракотворците со своите ракотворби го украсуваат градот на иста локација од 27 јули до 2 август.
„Манифестацијата е со долг стаж, ја организираме со гости – ракотворци од други градови на Македонија. ЗУР останува доследен на својата мисија во зачувување, вреднување, афирмирање и презентирање на македонската култура и традиција. Битолчани и сите кои минувате низ Битола деновиве, ве поканувам да ја посетите манифестацијата и да им дадете поддршка на македонските ракотворци“, вели Снежана Јанкулова, ЗУР Македонски ракотворби – Битола.
Успешен настап членовите на ова Здружение имаа и на 15-то издание на Локум фест, кој се одржа на 23 и 24 овој месец на пешачката зона покрај Драгор, кај Старата битолска чаршија. На крајот на месец јуни го завршија и проектот Жените можат – работилници за накит и изложба како завршен дел од проектот поддржан од Општина Битола.
Здружението постои 17 години и ги промовира културата и традицијата. Во нивните активности не спаѓаат само плетење и везење, туку имаат и членки сликари на стакло, порцелан, филигран од срма, изработка на предмети од дрво, се изработуваат макети на цркви од песок, од камен, од природни материјали, а како што вели Снежана Јанкулова, член на ова Здружение, работат тимски и организирано.
Исто така ова Здружение во изминатите 15 години има реализирано и бројни проекти меѓу кои се: Куќа на културата и традицијата, поддржан од Министерство за култура и Светска банка, Win-Win Жените во мрежа за иновативност и претприемништво – кофинансиран од ЕУ и националните фондови на земјите учеснички во рамките на ИПА-програмата за прекугранична соработка Македонија-Грција 2007-2013 г., Колонија на ракотворци од различна културна и етничка припадност Буково 2014, кофинансиран од Генералниот секретаријат на владата на РМ, „Во Срцето на Битола“, манифестација која се одржува 15 години во континуитет во рамките на Бит фест – финансиран од општина Битола и Министерство за култура, „Со љубов за Пустец“, донација на 2000 книги и ракотворби во општина Пустец, Р. Албанија – поддржан од општина Новаци и многу други.
