Во Скопје денеска ќе започне дводневната манифестација Интернационален гастрономски фестивал „Интерфестфуд 2026“, посветен на гастрономијата, традиционалната кујна, кулинарските вештини, едукацијата и хуманоста.
Фестивалската програма ќе се одвива во периодот од 10:00 до 18:00 часот, а покровители, домаќини, организатори и реализатори на проектот се Веро Центар и ХОА – Ангелчиња.
Првиот фестивалски ден, 3 октомври, ќе понуди повеќе гастрономски натпревари и ревијални содржини, меѓу кои подготовка на национално јадење во котле, декорација на десерт „Black Box“, подготовка на месо на скара, подготовка на баници и пити на самото место, презентација на национални кујни, како и ревијална изложба на ситни колачи и слатки пити. Посетителите ќе можат да го посетат и Гастро пазарот, а програмата ќе биде дополнета со музички и културни содржини – соопштуваат организаторите.
Фестивалот има и хуманитарен карактер. Производите од ревијалниот изложбен дел, како и подготвените пити и баници, ќе бидат донирани на хуманитарната организација „Св. Спас“, со што гастрономијата и дружењето ќе добијат и дополнителна општествена вредност.
На 4 октомври програмата продолжува со Гастро пазар, натпревар во декорација на мали торти меѓу ученици од основни училишта, натпревар во брзо јадење десерти, како и концерт на ученици од Музичкото училиште „Андријана Јаневска“.
„Интефестфуд 2026“ има цел да овозможи размена на искуства меѓу учесниците, да го поттикне натпреварувачкиот дух и соработката во гастрономскиот сектор, но и да создаде простор за дружење на посетителите со домашните и меѓународните учесници и реномирани шефови и судии. Фестивалот е наменет за професионалци од угостителството и слаткарството, ученици, излагачи од гастрономскиот и туристичкиот сектор, како и за пошироката јавност.
Веро Центар и Хуманитарната организација „Ангелчиња” ги покануваат граѓаните на 3 и 4 октомври да бидат дел од „Интерфестфуд 2026“ и во два фестивалски дена да уживаат во традиционални вкусови, кулинарски натпревари, гастро презентации, музика и хуманитарни активности.
Интерфестфуд 2026
