Во Берово в недела ќе се одржи акција за засадување дрвца како дел од иницијативата „Иднината на светот – Од нас зависи“, во организација на здружението Патфајндерс.
-После огромниот пораз и болката што остана во оние кој се свесни за последиците и ненадоместливите штети од големите пожари што ја зафатија Малешевијата, по кои остана само пепел и тишина, ние решивме заедно да се организираме и барем со мал дел посветеност на секој од нас да и помогнеме на природата да се регенерира и повторно да има дом за шумските жители, истакнаа организаторите.
Акцијата како што додадоа ќе започне во недела (14 ноември 2021) со почеток во 10 часот, заради што упатија отворена покана за сите кои сакаат да се вклучат.
-Локацијата за пошумување е просторот позади пиланата „Три реки“ што се наоѓа на патот помеѓу Берово и Струмица на еден километар после излезот за село Ратево. За полесна реализација на акцијата, секој кој е заинтересиран да се вклучи во реализација на активноста потребно е да понесе свој личен рачен алат. Превозот е во сопствен аражман на волонтерите и да нагласиме дека локацијата е на 20 до 50 метра од асфалтниот пат – додадоа организаторите.
Според планираното, во рамки на акцијата е предвидено да бидат засадени повеќе од 5.000 дрвца.
Извор: МИА
