Денеска во просториите на Агенцијата за поттикнување на развојот на земјоделството во Битола, се одржа последната презентација на мерката 115 – ,, Поддршка на активен женски член на земјоделско семејство”.
На презентацијата која ја водеше одговорниот советник од АПРЗ, Андреа Соколовски, присуствуваа и претставници од Министерството за земјоделство шумарство и водостопанство, Факултетот за земјоделски науки и храна и Платежната агенција. Учество во работата земаа и претставници на UN Women – Тело на Обединетите нации за родова еднаквост и зајакнување на жените, претставници на некои земјоделски здруженија како и индивидуални земјоделци кои беа заинтересирани за аплицирање по оваа мерка.
На самиот почеток беше потенцирано дека рокот за аплицирње истекува за два дена, поточно на 26 декември, и дека во овој период надлежните институции забележале голем интерес за оваа мерка од страна на жените кои се занимаваат со земјоделство.
Се стави акцент на целите која ги има оваа мерка , а тоа е поддршката која треба да им се даде на жените носители на активни земјоделски стопанства со што би се подобриле целокупните резултати од нивното работење и достигнување на повисоки стандарди од минималните.
На присутните повторно им беа презентирани прифатливите инвестиции и трошоци, висината на поддршката која изнесува 180 000 денари, а исто така и целокупната документација која е потребна за аплицирање.
Од страна на претставниците на надлежните институции беше напоменато дека оваа мерка за прв пат е објавена годинава и всушност претставува пилот мерка.
Во текот на аплицирањето заинтересираните се соочиле со некои нејаснотии и недоречености кои биле успешно надминати, а дел сеуште се решаваат. Сите овие забелешки ќе бидат надминати за следниот повик, а еден од предлозите е да се зголеми сумата на поддршката како би можеле жените кои се занимаваат со земјоделство да развијат сопствен профитабилен бизнис, беше заклучокот на средбата.
