Во денешното интервју за емисијата „Жешко политичко лето“ на Канал 5, министерот Хоџа беше прашан: „Го туркате законот за продажба на државно земјоделско земјиште и покрај толку многу негативни критики. Како очекувате овој закон да добие поддршка? Неговиот одговор е во насока да се демистифицира политичката заднина на сите оние кои се изјаснуваат дека се против овој закон, како и критикувањето без доволно да се знае кои се придобивките за земјоделството и целокупната домашна економија.
„Јас не се согласувам дека повеќе се негативни критики, бидејќи негативните критики се или политички настроени или од луѓе кои немаат допирни тички со земјоделство. Некој се обиде преку законот да направи политичка агенда, што јас како министер, тоа нема да го дозволам и го кажав неколку пати. Сум бил на терен со земјоделци и со тие помалите и со тие поголемите, за да го дообјасниме и што точно се добива со законот. Ако се сеќавате на почетокот, некој од засегнатите страни како што се Национална федерација на фармери, Сојузот на задругари и други, тие беа против идејата но, кога седнавме и дообјаснивме што точно се добива и колку развој се добива во земјоделството со носењето на самиот закон и колку ќе добијат тие што имаат под закуп земјоделско земјиште, и остатокот на слободно земјоделско земјиште што неможеме да го ставиме во функција, а преку овој закон би го ставиле, се укажа на потребата дека навистина овој закон е подобар, овој закон е развоен, не само во делот на земјоделството туку и на економијата… Морам да кажам, надвор од секоја скромност, дека ова е единствениот закон што толку време се дебатира и е ставен на јавна расправа, за да може да извадиме навистина најдобро можно решение“.
