Тим од владини економски советници вчера беше во работна посета на Кавадарци каде што остварија бизнис-средби со градоначалникот Митко Јанчев и претставници од бизнис-секторот. По разговорите во кабинетот Јанчев со гостите ги посетија: Винарија „Попови“, „Синалко“ и „Кожувчанка“, „Слога Пром“, Винарија „Јаковлевски“ и ВВ „Тиквеш“.
Високата владина делегација составена од економски советници и промотори во која беа Директорот за економска и јавна дипломатија, амбасадорот Игор Попов, економскиот советник за Турција Сузана Тунева, економскиот советник за ОАЕ и земјите од заливот Бекри Ајдини, економскиот советник за Полска и земјите од Вишеградската група, Иле Псалтиров и економскиот советник за Германија и Австрија, Абдилџемил Саити. На почетокот на посетата тие во кабинетот на градоначалникот Митко Јанчев остварија средби со претставници од бизнис секторот во градот, се запознаа со увозно извозните активности и работата на компаниите.
Следуваше посета на семејната винарија „Попови“, каде што се запознаа со квалитетот и винските сорти, количеството и начинот на производство. Следуваше и посета на апартманите во склоп на винаријата по што во краток разговор со сопствениците се разговараше како би можеле тие да помогнат каде и како да ги промовираат нивните вина и на кој начин и владата би можела да им излезе во пресрет на ваквите и слични винарии. Потоа гостите заминаа во посета на компанијата „Кожувчанка“. Овде високата делегација оствари средба со менаџерката Јанинка Чупарковска со која заеднички направија тура низ производниот погон и разговараа за работи кои тие како економски советници и промотори би можеле да ги применат.
Советниците се запознаа со комплетниот процес на производство како и со сите алктивности кои оваа компанија ги презема како во нашата држава, така и надвор од границите на Македонија. Следуваше и посета на компанијата „Слога пром“. Беа разгледани капацитетите на компанијата, а потоа во разговор со сопственикот се осознаваа податоци како Владата, а и самите тие како промотори би можеле да помогнат во развојот на компанијата, но и поттикнување на извозните активности во земјите каде што тие ке бидат актуелни економски советници.
Владината делегација ја посети и семејната винарија „Јаковлевски“. На лице место се запознаа со процесот на производство, капацитетите и сортите на грозје и вино кои оваа винарија ги практикува. Во разговор со сопственикот, покрај дегустацијата се разговараше и за сите проблеми со кои малите семејни винарии се соочуваат и на кој начин би можело да им се излезе во пресрет, а особено со промоција ширум светот како еден чекор кон зголемувањето на извозот на квалитетни вина од нашата држава. На крај високата делегација работната посета ја заврши во најголемата балканска визба ВВ „Тиквеш“.
Извор: rtk.mk
