Марио Илиевски од Куманово, заедно со неговите двајца браќа, ја продолжуваат дваесетгодишната семејна традиција за одгледување на свињи. Капацитетот на фармата е 100 маторици и околу 1000 прасиња. Сите сложно работат во фармата и се задоволни од бизнисот.
-Јас се занимавам со производство и продажба од дете, уште како мал имав интерес за овој бизнис. Инаку инвестицијата е на мојот татко, овој бизнис го работи веќе 20 години, ние сме тројца браќа и сите сме вклучени во работата – вели Марио за Агротим.
Годишно во фармата продуцираат околу 1700 до 1800 прасиња од кои 1000 ги товат, а останатите ги продаваат.
-Немаме проблеми во производството затоа што се е по ХАСАП, имаме одлични услови за исполнување на стандардите за благосостојба на животните. Пласманот го решаваме така што малите прасиња ги печеме, имаме сопствена фурна, а гоениците ги продаваме како свежо месо во ресторани и месари низ цела Македонија и сме презадоволни, сите го знаат нашиот квалитет на месо -вели Марио Илиевски.
Задоволни се од работата и од поддршката на државата за оваа сточарска гранка.
-Користиме субвенции од Владата и многу сме благодарни. Имаме субвенции за приплодни грла – маторици и субвенции за гоеници предадени во кланица. Планираме зголемување на капацитетот и уште еден објект за околу 300 до 500 гоеници. Планови за иднина – само напорна и сложна работа заедно со браќата и само така може да бидеш успешен, кој сака да работи Македонија е Швајцарија.
