Интелигентната мотика е нов тип машина претставена од Photoheyler, а е развиена од младите германски иноватори Стефан Хајнрих и Томас Стангл, кои за нивниот изум ја добија сребрената награда Agritechnica.
Благодарение на модерната технологија која ги поврзува поставените камери и тракторот, машината со најголема прецизност се води низ редовите и може да обработи еден хектар за еден час.
Нејзината предност е што мануелната работа е сведена на минимум со истовремено подобрување на механичката контрола на плевелите во органски услови.
Во овој вид на земјоделство, кој сѐ повеќе се промовира, контролата на плевелот е исклучително важна, особено во почетните фази на култивираните растенија. Голем дел од времето и работната сила се троши на окопување на посевите. Како што истакнуваат иноваторите, овој концепт комбинира неколку новитети.
Камерите прецизно ги снимаат посевите, а со помош на сензори се контролираат тркалата во согласност со движењето на тракторот. Тоа овозможува прецизна манипулација со тракторот и машината долж редовите. Со помош на хидраулични цилиндри се контролираат тркалата на машината кои се синхрони со цилиндрите на тракторот, односно ги следат.
Системот на ротирачки мотики има координирана работа со камерите лоцирани напред, а на задната страна е поставена камера што овозможува полесно возење на тракторот.
Ротациските мотики го отстрануваат плевелот во редот под агол од 90 степени. На овој начин отстранетиот плевел од редовите го сместува во меѓуредно растојание.
Овој млад тим планира во иднина да ја надгради машината и да овозможи прскање на пестициди директно на несаканото растение, со што би се овозможило прецизно дозирање и заштеда.
Како работи оваа мотика погледнете во видеото:
