За профитабилно земјоделско производство потребна е современа механизација со која ќе се работи без загуби или тие ќе се сведат на минимум.
Најголем дел од земјоделските производители последниве години набавија сопствена механизација и се поретко се случува да има побарување на услуга за орање. Но доколку постои таква потреба од страна на производителите можат да ангажираат орачи кои со нивна механизација ќе ја извршаат таа агротехничка мерка.
Прашавме неколку земјоделци кои не информираа дека нивната услуга ја наплаќаат по цена од 5000 – 6000 денари орање за еден хектар. Или половина од цената, ако сопственикот го набави горивото.
Потпретседателот на Асоцијацијата на земјоделците, Гоце Серафимов вели дека се помалку има ваква потреба од страна на земјоделските производители затоа што ова значително го зголемува трошокот на производство и тие што сериозно се занимаваат со земјоделство имаат набавено земјоделска механизација.
-Последниве години, благодарение на поддршката од државата за набавка на нови трактори и друга механизација, 20 -30 % од возниот парк го обновија земјоделците. Тоа ја намали потребата од изнајмување на орачи, затоа што скоро секој сериозен земјоделец има добра механизација. Знаеме дека се скапи сите суровини за производство и уште ако се плаќа орање, тањирање и други операции тогаш нема да му се исплати производството и нема да заработи ништо. Очекуваме дека ваквата поддршка од страна на државата ќе продолжи и ќе ни помогне на тие што се занимаваме само со земјоделско производство за да можеме да ги обработуваме површините и да го зголемуваме домашното производство на храна – вели Серафимов.
