Директорот на Агенцијата за финансиска поддршка во земјоделството и руралниот развој, Никица Бачовски, вели дека земјоделсците се најмногу заинтересирани за средствата од ИПАРД за набавка на земјоделска механизација, системи за наводнување, земјоделска опрема и пчеларство.
„Од тие 2360 договори што се склучени, над 1000 се сигурно во делот на земјоделската механизација, пред се заради тоа што во таа мерка како корисници можат да се јават и физички лица. Во делот за мерката каде што поддржуваме преработка на земјоделски производи, сепак се јавуваат само правни лица, односно тоа се преработувачки капацитети кои во помал обем се јавуваат како апликанти, но нивните инвестиции се поголеми во вкупната сума што ја издвојуваме.“, вели Бачовски.
Бачовски потврдува дека Македонија е лидер на Балканот за користење на ИПАРД фондовите.
„Добро оди работата со ИПАРД 2, средствата се целосно искористени и токму затоа во следниот период во ИПАРД 3 ќе имаме уште поголем буџет, односно 97 милиони евра кои ќе бидат ставени на располагање оваа година преку објавување повици за ИПАРД 3.“
Дека средствата од ИПАРД се достапни за секој кој има добар проект, говори и личното искуство на Александар Крстевски – земјоделец кој е успешен корисник на мерката за инвестиции во модернизација на земјоделските стопанства, а како тој ги искористил средствата од ИПАРД фондовите, можете да погледнете во видеото.
