Во скопското село Света Петка, 95% од жителите се занимаваат со производство на јагоди. Квалитетот е одличен, но пласманот е стихиен и несигурен, и тоа е нивниот најголем проблем.
Решението за нив, како и за сите земјоделци, треба да е во здружувањето и заедничкото делување. Ова особено важи за младите и образовани земјоделски производители, кои треба да им помогнат на другите земјоделци преку следење на новите модерни текови, како во производството, така и во пласманот. На тој начин помошта ќе биде за целото село.
Екипата на Агротим разговараше со младите земјоделци од ова село за идејата да формираат Земјоделска задруга. Со оглед на тоа што не беа запознаени со постапката за формирање на Задругата, договоривме средба на претставник од селото, младиот Ердо Џафери со Гоце Георгиевски – Раководител на сектор за рурален развој во МЗШВ кој им ја објасни целата постапка на формирање на задругата.
На наше големо задоволство, иницијативата почна да станува реалност и Агротим ќе продолжи да го следи целиот процес на формирање на Задругата на земјоделците од Света Петка. На тој начин ќе покажеме дека е важно да се има вистинска информација и едукација на земјоделските производители за да ги користат мерките на Владата кои се во нивен интерес. Исто така преку примерот на здружувањето на земјоделските производители од Света Петка ќе се види дека формирањето на задруга не е нешто комплицирано и недостижно а придобивките се големи.
Погледнете го видеото и уверете се сами што се е потребно за да формирате задруга и како до земјоделска механизација која 90% е субвенционирана од државата и други предности кои ги нуди овој начин на здржување на земјоделците:
