Европската комисија предложи продолжување на т.н автономни трговски мерки, односно суспензија на увозните царини, квоти и мерки за заштита на трговијата поврзани со украинскиот извоз во Европската Унија за уште една година. Со тоа продолжува поддршката за украинската економија и се помага да се ублажи тешката ситуација со која се соочуваат тамошните производители и извозници поради војната со Русија.
Главната цел на овие мерки е да се обезбеди поддршка за Украина, притоа почитувајќи ги интересите на индустријата на ЕУ. За таа цел и имајќи го предвид значителното зголемување на увозот на некои земјоделски производи од Украина во Унијата во текот на 2022 година, ова продолжување сепак содржи заштитен механизам, кој по потреба ќе може брзо да го заштити пазарот на ЕУ, порачуваат од ЕК. Сепак, не е прецизирано за каков механизам станува збор.
Парламентот и Советот на ЕУ ќе го разгледаат предлогот, имајќи ја предвид важноста да се обезбеди непречена транзиција од постоечкиот кон новиот режим.
Овие мерки се во сила од 4 јуни 2022 година и имаа позитивен ефект врз трговијата на Украина со Унијата. Тие, заедно со коридорите на солидарност, обезбедија исклучителна стабилност на трговските текови во текот на 2022 година и покрај нарушувањата предизвикани од војната и општиот тренд на значително намалување на вкупната тамошна трговија.
Ова го потврди и потпретседателката на Владата и министерка за економија на Украина, Јулија Свириденко, наведувајќи дека благодарение на целосното укинување на царините, нивниот бизнис успеал да го зголеми извозот во ЕУ за време на војната, пишува APK-Inform.
„Во 2022 година извозот во ЕУ изнесуваше 27,9 милијарди долари. Тоа е 63 отсто од нашиот минатогодишен извоз“, нагласи таа.
Напишете коментар