Двајца крадци украле 45 шишиња вино вредни повеќе од еден милион евра, меѓу кои и шише старо 215 години вредно неверојатни 350.000 евра, пишува Декантер. Кражбата се случила во луксузниот хотелско-ресторански комплекс „Атрио“ на југозападот на Шпанија во градот Касерес.
Според Хозе Полу, еден од сопствениците, сето тоа се случило доцна во ноќта, околу една и пол часот по полноќ. Јавноста не е изненадена што крадците го избрале ова место бидејќи се работи за угостителски објект со две Мишелин ѕвезди, во чии рамки има визба со повеќе од 40 илјади шишиња. Меѓу нив биле украдени и 10 шишиња Château D’Yquem од бербите од 1806,1883,1884,1891,1899, 1900 и 1901 година.
„Крадците се професионалци, точно знаеле што прават. Знаеле како да ги скршат магнетните брави на вратите од визбата“, изјави сопственикот за AP news. Открил дека вкупната вредност на украдените вина е околу еден милион евра, а се работи за реколти од 1806 до 2012 година.
Осомничениот маж и жена зборувале англиски и оставиле впечаток на многу префинет пар. Жената била на возраст од четириесет години, користела швајцарски пасош и носела перика, била придружувана од маж, кој го извршил грабежот. Доцна вечерта се јавиле на рецепција и побарале храна во собата. Грабежот се случил додека рецепционерот околу 01.30 часот правел салата и десерт за парот. Кога рецепционерот отишол во кујната, оставајќи го просторот без надзор, човекот се симнал во подрумот и ги украл шишињата, што подоцна можело да се види на снимката од безбедносната камера.
Каде ќе заврши виното?
Парот се одјавил од хотелот во раните утрински часови, ги платил трошоците за сместување со кредитна картичка, па го напуштиле местото со 45 шишиња скапоцени вина. Оваа информација за многумина е чудна бидејќи сепак е голема количина, и како е можно никој да не забележи.
Полу смета дека парот работи за приватен колекционер бидејќи земале само шишиња кои не можат да се заменат или да се продаваат на отворен пазар.
„Тие се препознатливи, Château d’Yquem од 1806 година е уникатен, сите знаат дека е наш“, рече сопственикот, додавајќи дека на пазарот би забележале дека е ставен на продажба.
„Како и уметноста, виното се поврзува со задоволство и луксуз и понекогаш може да достигне ирационални цени“, вели Давид Ремартинез, критичар и новинар. Тој додаде дека тие шишиња не можат да се продаваат јавно, но дека сѐ уште постои скриен пазар за нивна размена. Ги предупреди останатите колекционери дека поради оваа кражба треба да внимаваат и да ги зголемат мерките за безбедност во нивните подруми.
Некои веруваат дека измамниците би можеле да го додадат украдениот предмет во поголема колекција што се продава, па нивното потекло да го скријат меѓу другите слични шишиња и сето тоа да го поткрепат со фалсификувани документи.
„Не ни ги зедоа само вината, туку и нашите соништа“, вели Полу.
Шпанската форензичка полиција од Мадрид заедно со локалната управа го истражуваат злосторството.
