Во изминатата седмица имавме променливо облачно со сончеви периоди и повремени врнежи од дожд, а на планините од снег, и умерен до засилен северен ветер, кој предизвика опаѓање на температурата. Овие временски услови се очекувани за зимски услови и услови на презимување на земјоделските култури.
Во овој период треба да се почне со резидба на виновата лоза. Секоја сорта на винова лоза има специфични услови на одгледување, доколку почвените услови тоа го дозволуваат земјоделците можат да започнат. Режењето на виновата лоза е многу значајна агротехничка мерка и претставува најважниот чекор во одгледувањето на лозјето. Со резидбата се отфрлаат сите суви, болни и стари органи од лозата. Се овозможува нивна регенерација и се продолжува векот на рентабилно одгледување на виновата лоза. Со редовна резидба, се овозможува одржување на саканиот облик на лозата. Доколку редовно не се врши, ќе дојде до промена во приносот и квалитетот на добиеното грозје. Таа е обемна операција и потребно е време да се заврши навреме.
Во наредните денови следува период на стабилно и суво време со студени утра, на повеќе места со негативни утрински температури, а дневните ќе бидат во границите на просекот за овој период од годината. Во петок и сабота по одделни котлини ќе има услови за појава на магла и ниска облачност.
Доколку почвените услови тоа го дозволуваат земјоделските производители може да почнат или продолжат со активностите и грижата за нивните посеви и изведување на работи во поле. Минималната температура ќе се движи во интервал од -9°C до 3°C а, максималната температура ќе се движи во интервал од 2°C до 11°C.
