„Во делот на овчарството морам да кажам дека согласно ветувањата и Програмата ние ги зголемивме субвенциите за 50%. Сега субвенцијата за грло овца изнесува 3.000 денари. Дополнително за литар предадено млеко од постоечките 6 денари ги зголемивме за 7 денари за литар“, истакна министерот за земјоделство, шумарство и водостопанство, Цветан Трипуновски при своето гостување во „Студио 10“ на 24ТВ.
„Органските производителите добиваат дополнително 1.500 денари по грло. Работиме да се зголеми сточниот фонд и поради тоа предвидовме мерка за зголемување на основното стадо, секој кој што ќе го зголеми своето стадо за минимум 30% ќе добиe 30% зголемени субвенции“, појасни министерот.
Тој додаде дека во текот на вчерашниот ден на околу 4.500 млекопроизводители им се исплатени субвенции. За цела 2024 година им се исплатени средствата.
„Располагаме со квалитетно јагне, кое што е барано надвор од нашите граници, Министерството секогаш ќе биде тука за овчарите, за фармерите и земјоделците“, додаде Трипуновски.
„Досега се откупени некаде 120.000 јагниња согласно податоците со кои што располагам. Побарувачката на јагниња би требало да заврши во текот на 7 до 10 дена. Се очекува да се откупат дополнително од 8 – 10.000 јагниња, значи дека ќе биде сето откупено“, истакна министерот.
Министерот Трипуновски посочи дека според сегашната Програма секој фармер треба да има минимум предадено 50% од јагнињата за да може да биде корисник на основната мерка.
„Ја следиме состојбата и по завршување на откупот, наредниве денови ќе направиме анализа.
Има една ситуација со дел од јагнињата кои не се продадоа за божиќните и новогодишните празници, а се со поголема тежина од тоа што треба да е прва класа. Ќе ја надминеме ситуацијата, по завршување на откупот ќе се обидеме да делуваме, да помогнеме на сточарите со измена, корекција на мерката со цел одгледувачите на овци да можат да ги искористат предвидените средства од мерката во целост за 2025 година.Ги уверувам фармерите дека секогаш ќе бидеме на нивна страна – нагласи тој.
