Вчера во Центарот за култура во Битола се одржа трибина на која претставници од МЗШВ одговараа на прашањата на земјоделците во врска со задолжителното земјоделско осигурување.
На трибината беше потенцирано дека задолжителното земјоделско осигурување ќе има за цел да бидат осигурени сите земјоделци и ќе биде еден од условите за исплата на субвенциите.
Висината на полисите ќе ја утврдува државата и со нив ќе се опфатат повеќе ризици од што опфаќаат досегашните полиси. Беше објаснето дека осигурителните компании веќе нема да можат да нудат осигурителни полиси за земјоделците, а обесштетувањето ќе се врши само преку Пулот за земјоделско осигурување.
Како што информираа претставниците од МЗШВ, со донесувањето на овој закон, треба да се намалат бирократските процедури и исплатата за настанатите штети ќе биде извршена во текот на истата година кога е настаната штетата.
Александар Мусалевски од МЗШВ нагласи дека земјоделците не треба да бидат загрижени бидејќи овој Закон е во полза на земјоделците. Со него, сите штети што досега со стариот систем се исплаќале за 2-3 години, со новиот закон ќе се исплаќаат во тековната година кога настанала штетата, објасни Мусалевски.
Од страна на земјоделците имаше позитивни излагања и дискусии, како и сугестии за доработување на Законот.
Во наредниот период претставниците од МЗШВ ќе продолжат на терен да одржуваат трибини и состаноци со земјоделците со цел да им го доближат новиот концепт на земјоделско осигурување.
Климатските промени треба сериозно да се сфатат од земјоделците не само од МЗШВ и токму затоа и пораката на кампањата е – Нема компромис со климатските промени – твоја одговорност е да го заштитиш сопственото производство и добиток.
Напишете коментар