Во Општина Теарце се одржа средба со земјоделците во организација на Земјоделската задруга ШАРИ и Агротим на тема едукација и информација за актуелниот повик за Мерка 7 од ИПАРД и други можности за користење на грантови како и начинот на регистрирање за продажба од куќен праг.
Претседателката на задругата, Бехари Незири ја потенцираше важноста од ваквите средби за земјоделските производители кои најчесто се жалат дека не се запознати со условите за аплицирање за да можат да ги користат средствата од програмата ИПАРД како и други мерки од Владата.
Темата беше актуелниот повик за ИПАРД за Мерка 7 но и за очекуваниот повик за Мерка 1 која беше посебно интересна за фармерите од овој крај преку која можат сточарите да изградат фарма, да набават механизација, технологија и се што е потребно за една модерно сточарско производство.
На средбата стана збор и за услови треба да ги исполнат фармерите за да можат да продаваат од куќен праг како начин за започнување на семеен бизнис. Постапката започнува со одење во Подрачните единици на АХВ и пополнување на барањето за воведување во евиденција на оператор за храна од примарно производство. Условите и критериумите кои што треба да се исполнат не се воопшто тешки и комплицирани за земјоделските производители и ова е одлична можност, а за некои досегашни мерки на МЗШВ и услов за аплицирање.
Како обично се случува, не поминува ниту една средба со земјоделци, а да не се коментира поделбата на субвенциите и начинот на исплата. Одгледувачите на овци реагираа на промената на субвенциите во овчарството и побараа да се врати стариот модел на субвенционирање.
Ветивме дека ќе информираме за овој проблем на одгледувачите на овци и ќе го поддржиме нивното барање затоа што овчарството е тешка сточарска гранка која заслужува секаква поддршка од страна на државата, а каква помош им треба најдобро знаат фармерите.
Секретарот на Земјоделската задруга ШАРИ, Насер Џемаили уште еднаш ја потенцираше важноста на ваквите едукативни средби кои се потребни за производителите. Исто така ги повика и другите земјоделци да се зачленат во задругата за заедничко делување и поддршка на секторот овчарство. Најави активности во делот на исплатата на субвенциите, враќање на стариот модел и одржување на вакви средби и во други општини.
