Светската трговија со боровинки ќе се зголеми на 3 милијарди долари до 2025 година, стои во извештајот на американското Министерство за земјоделство (USDA). Како што е наведено, 7-те најголеми извозници на боровинки – Перу, Чиле, Мексико, САД, Јужна Африка, Полска и Канада – во 2019 година на светскиот пазар пласирале боровинки во вредност од 2,1 милијарди долари. Од 2016 година, вкупниот раст на извозот на бобинки од овие земји во просек изнесувал 18% годишно.
Глобалното производство и трговија забележале најдраматичен раст помеѓу 2010 и 2019 година, поттикнати од растечката побарувачка на потрошувачите.
„Ако извозот на овие земји расне во просек за 5% годишно во следните пет години, светскиот извоз на боровинки ќе достигне речиси 3 милијарди долари до 2025 година“, се вели во извештајот на USDA.
Глобалното производство на боровинки се зголемило повеќе од двојно помеѓу 2010 и 2019 година. Во овој период, бројот на земји со декларирано производство се зголемил од 26 на најмалку 30. Во 2010 година, само четири земји произвеле повеќе од 10.000 тони: САД (224.000 тони), Канада (84.000 тони), Чиле (76.000 тони) и Франција (11.000 тони).
Извор: italianberry.it
