Топлотните бранови и недостатокот на врнежи кои ја погодија Европа значително влијаат на сите растителни култури. Последниот извештај на Агенцијата за мониторинг на земјоделските култури MARS покажува дека драстично се намалени прогнозите за принос за сите летни култури во Европската Унија, особено за пченката.
Екстремни временски услови
Овој извештаен период беше обележан со екстремна суша и жештини во неколку региони изложени на долг дефицит на дождови. Ова се однесува на големи делови од Шпанија, Јужна Франција, Централна и Северна Италија, Централна Германија, Северна Романија, Источна Унгарија и Западна и Јужна Украина.
МARS го намали очекуваниот принос на зрна пченка на 7,25 т/ха во споредба со 7,87 т/ха минатиот месец. Тоа е 7,8 отсто под петгодишниот просек и 7,9 отсто под јунскиот.
Прогнозата за приносот на обичната пченица е намалена на 5,74 т/ха од прогнозата од 5,76 т/ха во јуни. Тоа е за 1,6 отсто под долгорочниот просек. Слично е и со приносот на пролетниот јачмен, чија прогноза беше 4,10 т/ха, наспроти јунскиот принос од 4,19 т/ха и сега е за 2,1 отсто под повеќегодишниот просек.
Намалени се и прогнозите за сончоглед за 8 отсто и за сојата за 9 отсто и сега се значително под петгодишниот просек.
Ожнеан е голем дел од зимските житарки (пченицата, јачменот, ‘ржта), а прогнозите за овие култури имаа мали отстапувања во однос на петгодишниот просек.
Прогнозата за принос на шеќерна репка е намалена на 77,4 т/ха, што е сепак за 4 отсто над петгодишниот просек.
Прогнозата за принос на компир е намалена на 35,1 т/ха, но сепак е над петгодишниот просек за 2,8 отсто.
