Што е резидба?
Резидбата е агротехничка мерка која подразбира сечење и отстранување на одредени делови од овошното дрво (гранки, ластари, суви или оштетени делови) со цел да се обезбеди правилен раст, подобар принос и подолг животен век на овошката.
Зошто е важна резидбата?
Со правилна резидба се постигнува:
-подобро осветлување и проветрување на крошната
-повисок и поквалитетен принос
-рамнотежа меѓу растот и плодоносењето
-отстранување на болни и оштетени гранки
-полесно прскање и берба.
Зимска резидба
Периодот на мирување на овошките (од доцна есен до рана пролет) е најпогоден за извршување на зимска резидба и заштитно прскање со бакар. Во овој период дрвото не вегетира, што значи дека интервенциите се помалку стресни, а ефектот е многу поголем.
Кога се врши?
Зимската резидба најчесто се изведува:
-од јануари до март,
-во денови без мраз и врнежи,
-кога температурите се над 0°C.
Не се препорачува резидба при силен мраз, бидејќи може да дојде до оштетување на ткивото.
Основни правила при резидба
Се отстрануваат:
-суви и болни гранки
-гранки што се прекрстуваат
-гранки што растат кон внатрешноста на крошната
Секој рез треба да биде чист и рамен.
Дебелите гранки се сечат со пила, а помалите со ножици
По можност, поголемите рани да се заштитат со калемарски восок.
Прскање со бакар – зимска заштита
Зошто бакар?
Бакарните препарати се користат за превентивна заштита од габни и бактериски заболувања, како што се:
-бактериски рак
-краставост
-пегавост
-монилија
-кадравост кај праска
Бакарот делува контактно и ги уништува причинителите на болести кои презимуваат на кората, гранките и пупките.
Кога се прска со бакар?
Најдобар период за бакарно прскање е:
по завршување на резидбата,
во фаза на целосно мирување или пред пупење,
кога нема мраз и дожд најмалку 24 часа.
Кај некои овошки (праска, кајсија) се препорачуваат 2 третмани – еден во доцна есен и еден кон крајот на зимата.
Заклучок
Зимската резидба и бакарното прскање се основа за здрав и успешен овоштарник. Со навремена и правилна примена на овие мерки:
-се намалува појавата на болести
-се обезбедува подобар и поквалитетен род
-се продолжува животниот век на овошките
Добро подготвена овошка во зима значи силен старт напролет.
Стручен совет од Опитно поле – ФЗНХ.
