Освен хризантеми и еукалиптус, Тајана Станиќ од Пожега одгледува американски боровинки во вреќи. Тајана смета дека на овој начин поефикасно се штитат растенијата од плевел, но се регулира и киселоста на почвата, која е неопходна за оваа култура.
„pH вредноста треба да биде од 4,3 до 4,8. Тоа се постигнува со мешање на земјата со кисел балтички тресет, кокосови влакна и перлит, кои воедно ја задржуваат топлината и влагата“, објаснува Тајана за Земјоделската телевизија.
Сака кисела почва и има потреба од влага
По садењето се додаваат струготини, а Тајана советува дека ова е најдобро да се направи на есен, за киселината постепено со дождот да навлегува во почвата.
Исто така, треба да се исече на висина од околу 20 сантиметри за повторно да потера и да се стимулира коренот за подобро примање.
„Во првата година по садењето, цветните пупки се режат со цел да се добие грмушка што за една година треба да има еден килограм по садница. Во полната родност, боровинките можат да дадат од шест до 12 килограми од грмушка“, вели Станиќ.
Инаку, боровинката е многу издржлива, поднесува ниски температури, а некои сорти издржуваат дури и до -30° С. За да развие големи плодови полни со сок потребно и е сонце, а потребна и е и влага, особено од април до јули, кога започнува цветањето и зреењето на плодовите.
На семејната фарма на Тајана планираат наскоро да наводнуваат со систем „капка по капка“.
Тајана засадила 400 садници од две сорти, раната „дјук“ и доцната „либерти“.
„Раните сорти на нашето поднебје подобро успеваат, поради климата и температурата добиваме плодови порано и затоа постигнуваме повисока цена. Доцната сорта доаѓа во повеќе интервали, можете да ја берете и цел месец, еднаш неделно“, објаснува таа.
Бидејќи боровинките имаат плиток корен, во вреќи можат да бидат и до 10 години. После тоа, се пресадуваат во поголеми до 100 литри.
„Грмушката може да доживее 50 години, а садењето во вреќи им овозможува секогаш да имаат почва во која најдобро напредуваат“, вели Тајана.
Иако можат да се садат напролет, експертите препорачуваат да се садат во есен. Вреќите се ставаат на платно и на тој начин, покрај од плевелот, се штити и од продирање на кртови и глодари. Птиците се исто така големи предатори на оваа култура, па затоа е важно да се заштитат со ограда или мрежа.
Извор: agroklub.com
