Промената на времето која се случи во текот на денешниот ден, со продор на ладен и снежен бран од северо-исток допринесе за формирање и на снежна покривка на пониските места, но најчесто на планините особено во северните и западните делови од Републиката.
Ваквата временска состојба ги затекна овошките во фаза на цветање или прецветување, особено коскестите видови како кајсијата, бадемот и сливата џанка, но тука се и раните сорти праска.
Кајсијата во јужните делови се наоѓаше во фаза и на заметнување на плод, фено-фаза која е нај осетлива каде и темератури од -0,6 или -1,0 оС може да причини штети. Снегот како појава, но и температурите кои се одржуваат, добро е што денес се позитивни, состојба која не очекуваме да предизвика директни поголеми штети од самото задржување на истиот на деловите од цветот или евентуално плодот, штетите би биле поголеми доколку дојде до предвремено разведрување и спуштање на утринските температури со негативни вредности.
Добро во целата оваа состојба е што синоптичката состојба е таква што неколку дена со ред се одржува облачно време кое треба полека да се затоплува, а со тоа би се загреала и атмосферата до одреден степен, така што кога ќе дојде денот да не одмине овој бран и разведрувањето, ударот со негативни температури би бил послаб.
Како што одминува времето не се загрозени само коскестите видови, се повеќе се наметнува и опасноста и кај јаболчестите видови и во останатите региони кај кои вообичаено касни вегетацијата, сепак колку е по ниска фазата на развој, толку и отпорноста им е поголема. Штети претрпеа овошките и со мразот од минатата седмица во вторникот наутро, но барем засега нашите проценки се дека овие штети ќе бидат со проредување на родот, додека барем засега немаме извештаи дека има целосно уништување.
Не се само температурите фактор кој може да причинат штети, тука како фактор се јавува нивното времетраење, експозицијата на теренот каде се наоѓаат насадите, типот на почвата, присуството на влага во почвата и сл.
Моменталната состојба не е добра но далеку е од катастрофална, ваква иста состојба имавме на 23-ти март Светскиот ден на метеорологијата и во 2018 година, со снег и снежна покривка, па имавме овошки од сите видови. Според климатолошките податоци последните просечни датуми за појава на мраз во пролет само на мал број на станици е помината, така да ова не е прв пат да имаме вакви временски услови во овој период од годината.
Ангелко Ангелески, советник за агрометеорологија при УХМР
