Роеви од скакулци уништија илјадници хектари пасишта и ораници на Сардинија и дополнително ги оптоварија земјоделците кои со потешкотии се носат со последиците од пандемијата на корона вирусот, соопштија претставници на земјоделските задруги од овој италијански остров.
-„Скакулците оваа година уништија приближно 15.000 хектари пасишта во централната провинција Нуоро“, изјавил Микеле Арбау, од сардиниската подружница на италијанската земјоделска задруга Колдирети.
– „Земјоделците ги изгубија летните пасишта, а делумно ја изгубија и тревата за сено со која ја хранат стоката во текот на есента и зимата. Оние малку луѓе кои имаа засеано јачмен ќе мораат да заборават на овогодишната жетва“, вели Арбау.
Во текот на летните месеци, скакулците се вообичаена појава на Сардинија, туристичка дестинација позната по своите идилични плажи и ексклузивни одморалишта, меѓутоа овогодишната наезда е многу поголема отколку претходните години.
Минатата година, скакулците уништија околу 2.500 хектари што всушност до тогаш беше најголемата наезда од завршувањето на Втората светска војна.
Извор: Независне новине
