Пред 35 години Чарлс Вилбер го сруши Гинисовиот светски рекорд со својот домат кој израснал над осум и пол метри и дал скоро 200 кг плодови. Овој градинар издал книга со совети за одгледување на домати. Што тој советува?
Уште 1985 Вилбер од Алабама (САД) поставил Гинисов светски рекорд со своето стебло на домат високо 853,44 см кое имало над 180 кг домати, поточно 181,44 кг. Досега никој не успеал да го сруши овој резултат, а само еден домат тежел неверојатни 1,13 кг.
Растенијата кои ги одгледувал не само што биле огромни туку биле и многу родни, па така само четири корења домати, годишно дале околу 635 килограми сочни плодови. Иако можеби мислите дека посадените стебла биле ГМО, како што вообичаено сакаме да коментираме, тоа во оваа приказна не е вистина. Неговите домати 100% биле еколошки одгледувани.
Кои тајни ги открива тој во својата книга?
Овој успешен градинар ја напишал книгата “How to grow world record tomatoes” (во превод: “Како да се одгледува домат светски рекордер) која ги открива тајните за одгледување домати.
–Важно е да се кинат израстоците
„Израстоците или филизите, ако им се дозволи да растат, стануваат вистински стебла кои ќе создаваат уште повеќе израстоци. Ако се искинат, тогаш растенијата ќе можат да растат во висина“, напоменува Вилбер.
– „Ако гранката е лесна, дозволете им на израстоците да растат додека не се појави грозд со плодови, а потоа кинете ги“, советува тој. Пишува и дека кинењето треба да се прави со помош на пинцета или со прсти, а не да се сечат со нож или со ножици, тогаш раните подобро зараснуваат. Исто така важно е да се отстранат пред да достигнат големината од 4 см.
–Високи „кафези“
Вилбер не можел да пронајде доволно висок кафез (метална конструкција) за одгледување на своите растенија па решението го пронашол во ставање на конструкциите една врз друга. Како растат гранките нагоре, тој препорачува внимателно да се врзуваат за жиците од надворешната страна на конструкцијата, поради полесно берење на плодовите.
-„Растението може да се искачи до врвот и потоа да се спушта надолу или друг кафез да се постави врз првиот“, објаснува Вилбер.
–Ѓубрење
Користел прецизна мешавина од сено, коров и трева заедно со кујнски остатоци и свежо шталско ѓубриво. Тој препорачува анаеробен метод на компостирање, користејќи непропустливи садови, бидејќи тие чуваат 90% од азотот во однос на аеробното компостирање кое чува 60%. Во идеален случај прекриениот компост се загрева на сонце и достигнува температура која ги уништува повеќето болести.
–Правила за наводнување
Овој градинар вели и тоа многу е важна и водата која се користи за наводнување. Тој преферира дождовница или од рибник, а исто така вели дека поголем број од луѓе ја потценуваат должината на коренот на доматот кој може хоризонтално да се протега неколку метри од растението. Затоа е важно растението да се залева во широк круг.
Вештачките ѓубрива Вилбер ги избегнувал како и синтетичките хербициди. Во книгата пишува дека коровот го држел под контрола така што околу своите растенија ставал мулч од слама.
Извор: Агроклуб
