Невреме проследено со силен дожд и град, кое ја зафати Општина Босилово во саботата, предизвика штети на посевите во селата Дрвош, Сарај и Гечерлија.
Според информацијата од градоначалникот на Босилово, Зоран Зимбаков градот удрил на површини посеани со житни култури, бостан, овошни насади, пиперки, домати и слични култури.
– После вчерашното невреме од град што ја зафати нашата општина, денес извршив увид на терен и остварив средба со граѓаните од населените места Дрвош,Сарај и Гечерлија кои ми ги покажаа своите оштетени парцели во атарите посеани пред сѐ со житни култури, бостан, овошни насади, пипер, патлиџани и слични култури. Според тоа што го видов има доста големо оштетување, а најмногу е во с. Дрвош, па доколку се исполнети законските предуслови за прогласување на елементарна непогода, ќе се формира општинска комисија за утврдување на настанатите штети – информираше градоначалникот Зимбаков.
