Веројатно ќе се изненадите колку работи имате во вашата куќа, кои ви се на дофат на рака, а можете да ги користите во градината.
Овие 7 работи во домаќинството кои често се користат и/или најчесто се фрлаат, можат ефикасно да се користат во градината.
- Зовриена вода со растителни остатоци како дополнителна прихрана
Растенијата може да ги прихраните со свежи отпадоци што останале по подготовката на ручекот, на пример, да ги сварите остатоците од компирите, да ги изладите и со таа течност да ги залеете растенијата.
Покрај тоа, градинарските растенија можете да ги наводнувате со вода што сте ја користеле за готвење компири, јајца, тестенини, брокула, спанаќ, тиквички или пченка. Важно е водата да е несолена и да е изладена.
- Кора од банана како ѓубриво за растенијата
Кората од банана е многу здрава и има широка примена. Богата е со калиум, а обезбедува и пристојни количини на калциум и фосфор.
Еден од наједноставните начини е да ја исечете на парчиња и да ја закопате плитко во земјата околу растението (длабочина до 10 см). Може и да ги исушите корите од бананите, да ги исечкате, и потоа да ги расфрлате околу растенијата.
- Хартијата – фантастичен мулч
Стара хартија од пекарски производи, искинати хартиени кеси, ролни од тоалетна хартија… сето тоа можете да го користите како мулч. Едноставно ставете ја хартијата на основата на растението (исечете ја ролната) за да спречите раст на плевелот, и потоа додадете слој мулч за да ја камуфлирате хартијата. Ако плевелот е упорен, искористете двослојна или трослојна хартија.
Можете да користите и стари картонски кутии.
- Употребете вреќички чај за вашите растенија
Како што чаевите имаат позитивен ефект врз нас, така можат позитивно да влијаат и на растенијата. Вашите растенија ќе ги сакаат влажните состојки во кесичките чај. Сѐ што треба да направите е да ја отворите кесата и да ја расфрлите содржината околу растенијата.
Остатоците од чајот ја подобруваат структурата на почвата и ги хранат црвите. Ќесичките чај од нане се добри за одвраќање на мравките.
- Аспирин против инфекција на растенијата
Можете да им помогнете на вашите растенија да се борат со инфекциите со помош на аспирин. Аспиринот може да помогне во борбата против габични заболувања. За да користите аспирин во градината, растворете 2-3 таблети во 4 литри вода и потоа истурете ја водата во почвата околу вашите растенија. Можете да користите и фолијарен спреј, но не претерувајте, бидејќи може премногу да ги изгори растенијата.
- И растенијата уживаат во кафе
Кафето содржи хранливи материи, вклучувајќи азот, калиум, фосфор и антиоксиданси. Можете да ги полевате растенијата со остаток од разредено кафе. Цвеќето исто така сака кафе, а кафето ќе помогне да се заштитат растенијата од паразити.
- Сода бикарбона во борба против пепелница и други габични заболувања
Сода бикарбоната е многу ефикасно средство кое може да ги одврати штетниците и да ги заштити растенијата од габични заболувања. Таа е одлична алтернатива на фунгицидите и инсектицидите, не е штетна за растенијата, кои ќе дадат сочни плодови без присуство на нитрати и бакар. Покрај тоа, не ги уништува корисните инсекти и микроорганизми.
Само измешајте една кафена лажичка (5 мл) сода бикарбона со 4 литри вода. Можете исто така да додадете пола лажичка (2,5 мл) течност за миење за садови за да му помогнете на растворот да се залепи на растенијата. Растворот се прска фолијарно (над листовите) на растенијата 1 неделно, секоја недела во текот на сезоната на растење.
