Се воведува забрана за убивање на машки пилиња во ЕУ – Што значи тоа за пазарот?

Европската комисија ќе предложи постепено укинување на систематското убивање на машките пилиња низ Европската Унија, изјави комесарката за безбедност на храна Стела Киријакидес на состанокот на министрите за земјоделство на ЕУ, пишува Еурактив.

„Сакам да предложам постепено укинување на оваа практика“, најави Киријакидес и ги повика земјите од ЕУ да ги поддржат овие напори.

Милиони машки пилиња се убиваат секоја година веднаш по испилувањето, бидејќи тие се несоодветни за производство на месо и индустријата ги смета за комерцијално бескорисни. Оваа практика беше критикувана од активисти кои се борат за правата на животните и означена како неетички поради начинот на кој се убиваат – со мелење или задушување со гас. Коментарите на Комисијата дојдоа како реакција на поканата поднесена од Германија и Франција, а поддржана од Австрија, Белгија, Кипар, Финска, Ирска, Луксембург и Португалија. Значи девет земји побарале укинување на оваа практика. Германија и Франција го забранија на национално ниво од почетокот на оваа година, а неодамна оваа забрана ја воведоа и Австрија и Луксембург.

Земјите членки го поддржаа предлогот, но неколку го покренаа прашањето дека наметнувањето забрана за убивање машки пилиња во ЕУ може да значи преместување на проблемот на друго место – надвор од нејзините граници. Тие апелираа забраната да важи за сите производи на европскиот пазар, домашни и увозни, за да се одржи производството на храна во Европа.

Поради оваа причина, членовите и предложија на Комисијата да спроведе детална проценка на влијанието пред да предложи постепено укинување на ниво на ЕУ. Киријакидес најави дека Комисијата ќе го земе предвид економскиот контекст и ќе вклучи таква студија во нејзината тековна проценка на влијанието, како дел од ревизијата на законодавството на ЕУ за благосостојбата на животните.

Алтернативен метод

Паралелно се бараат алтернативни методи кои би овозможиле решавање на овој проблем. Економски е неисплатливо да се користат машки пилиња за производство на месо поради слабиот прираст.

Наместо да се мелат и да се задушуваат со гас, постои скапо техничко решение „in-ovo sexing“, кое им овозможува на производителите да го откријат полот на пилињата пред да се изведат и на тој начин да ги спречат машките пилиња воопшто да се изведат.