Поголемиот дел од градежните работи на територијата каде што се реализира проектот „Сирнаја долина“ (Долина со сирењето) , во близина на Москва е завршен, а истиот треба да започне со работа во декември оваа година. Ова е најголемиот руски комплекс за производство на сирење.
Сергеј Воскресенвки, министер за земјоделство на московскиот регион, го потврди тоа во својата изјава и објасни дека комплексот е изграден во уникатен формат на кластери, според кој десетина независни производители на сирење планираат да ги здружат силите.
Се очекува дека со овој проект, рускиот регион ќе стане најголем производител на сирење.
„Денес се наоѓаме на второ место според производството на сирење, веднаш по регионот Алтај. За да ги победиме, ни требаат само 6.000 тони“, истакна министерот.
Минатата година, московскиот регион произведе 60.000 тони сирење, додека капацитетот на новиот кластер ќе биде 20.000 тони сирење и 16.000 тони сурутка годишно. Според Воскресенвки, овие бројки мора да се израмнат до крајот на 2022 година, а во иднина властите имаат намера да го зголемат производството со привлекување повеќе компании на тој кластер.
Овој проект треба да ја направи областа најголем извозник.
“Во јануари и февруари 2021 година, регионот извезе 700 тони сирење во вредност од 1,8 милиони долари, што е 39,3 проценти од вкупниот извоз на руско сирење. Тоа е втор по големина извозник на таа храна по регионот на Ростов”, истакна тој.
Сепак, се очекува „ Долината на Сирење“ првенствено да им служи на потребите на 12 милиони жители на Москва. Главниот град на оваа огромна земја, наводно, има највисоко ниво на потрошувачка на овој млечен производ по глава на жител меѓу сите руски региони.
Овој комплекс, најавуваат тие, ќе има широк спектар на производи, од кои некои недостасуваат на рускиот пазар. Властите исто така планираат да започне да работи нова лабораторија во рамките на комплексот што ќе се грижи за квалитетот, здравјето и др. Сите производи ќе носат ознака за квалитет, а меѓу другото и потврда дека се направени без палмино масло, за кое е утврдено дека се користи во фалсификување храна во последните неколку години.
Вкупните инвестициски трошоци се проценуваат на околу 28 милиони евра. Исто така, на сите членови им се доделени од еден до три хектари земја, слободен пристап до нивната инфраструктура изградена од регионалната влада и 20 проценти субвенции за капитални трошоци.
Извор: Агроклуб
