Залихите на пченица во Русија, која е најголемиот светски извозник на оваа житарка, се намалуваат. Затоа е воведена извозна квота од 8 милиони тони. Имено, Москва е загрижена за растот на домашните цени и се обидува да го обезбеди сопствениот пазар.
Во 2021 година немаше посебни ограничувања за извозот, а планираната квота за периодот од 15 февруари до 30 јуни 2022 година изнесува 11 милиони тони житарки, вклучително и 8 милиони тони пченица, пишува Ројтерс. Првично беше планирано таа количина да биде 9 милиони тони.
Нејзиниот извоз од таа земја е намален за 37,5 отсто од почетокот на маркетиншката сезона 2021/22, поради пониските приноси и извозниот данок кој ќе се зголеми на 91 долар за тон од 22 декември.
Тамошното Министерство за земјоделство во ноември објави дека Русија може да ја промени формулата што ја користи за пресметување на квотата во случај глобалните цени да се зголемат на 400 долари за тон, според Блумберг. Во случај на поскапување, ќе има итно прилагодување на извозот за заштита на домашниот пазар.
И Аргентина воведува ограничувања
Аргентинската влада на 17 декември годинава објави дека ќе воведе квота за извоз на пченка и пченица во маркетиншката година 2021/22, за да се спречи недостигот на домашниот пазар поради поскапувањето на храната. Според World-Grain, тие го ограничуваат извозот на пченка на 41,6 милиони тони, а на пченица на 12,5 милиони тони.
Оваа земја е примарен извозник на пченица во јужноамериканските земји и втор најголем извозник на пченка во светот. Во оваа маркетиншка година извезла 39,8 милиони тони пченка и 11,2 милиони тони пченица. Покрај тоа, Аргентина воведе и ограничување на извозот на говедско месо.
Сојузното министерство за земјоделство (ФАС) предвидува дека земјата ќе постигне рекордно високо производство на пченка од 54 милиони тони и пченица од 20 милиони тони во периодот 2021-2022 година.
Добра прогноза за Русија
Поради добрата состојба на пченицата во Русија се предвидува приносот за следната година да биде од 80 до 81 милиони тони, пренесува Агрархеуте. Минатата година изнесуваше 74,5 милиони тони.
Добрата состојба на зимските посеви сугерира дека приносот во 2022 година може да биде 61,25 милиони тони, што е значително повеќе од 55,12 милиони тони од 2021 година.
Површините за пролетната пченица, која ќе се сее напролет ќе бидат помали, но се очекуваат приноси од 19,94 милиони тони.
