Руското ветеринарно друштво, „Rosselkhoznadzor”, во јули, го забрани увозот на сите додатоци за добиточна храна од Холандија, откако со рутинска инспекција беа откриени остатоци од ГМО во производите испорачани во компаниите “Vobra Diervoeders Loosbroek” i “P. C. van Tuijl Kesteren”.
Во соопштението понатаму се појаснува дека руските и холандските ветеринарни служби користат различни методи за откривање на ГМО, што значи дека увезените производи не можат да се сметаат за безбедни, пишува allaboutfeed.
Забранет е важен додаток во храната за телиња
Русија увезува скоро 90% од адитивите за добиточната храна, а многу вакви производи доаѓаат од Холандија.
„Ако проблемот не се реши брзо, тоа може да и наштети на сточарската индустрија бидејќи земјоделците се лишени од многу потребни производи“, изјави руската компанија Mustang Feeding Technologies , која произведува адитиви за добиточна храна.
На пример, забраната го запре увозот на производот Лакто Енергија. Станува збор за додаток на добиточна храна за млечните крави, кој заеднички го развија Мустанг и холандската компанија „Дависион“. Производот е наменет да го стимулира метаболизмот и да го намали ризикот од кетоза. Исто така ја зголемува содржината на протеини во млекото и ја подобрува енергетската рамнотежа. Има сладок вкус, што ја зголемува допадливоста на храната.
“Овој додаток е едно од основните средства за одржување на здравјето и продуктивноста на животните. Неговото дејство има за цел да го компензира енергетскиот дефицит кај телењето, што е крајно тешко да се постигне со други средства“, соопшти компанијата Мустанг.
“Единствената алтернатива е таканаречениот напреден вид на диета, кој има сериозни недостатоци бидејќи хранењето животни над нормата доведува до неповратни последици и влијае на нивното здравје и ефикасност на производството. Таквиот начин може да предизвика субклинички и клинички форми на ацидоза и кетоза, за кои е потребен дополнителен третман“, додаваат тие.
Забраната исто така го запре увозот на некои органски киселини кои се користат како замена за антибиотиците.
Забранети се дури 108 додатоци на храната
„108 додатоци на храната со докажана ефикасност и безбедност се забранети, а ги користат многу руски компании“, изјави Сергеј Микнујик, претседател на Руската национална унија за добиточна храна (НФУ), додавајќи дека забраната е неоснована.
„Едноставно е погрешно да се забрани увоз од добавувачите од целата земја, кога само кај производите од неколку компании ги имаа овие остатоци од ГМО“, истакна Микнујик.
Тој исто така вели дека некои сложени адитиви во храната не можат да се заменат, бидејќи тоа ќе придонесе за одредени загуби во сточарството. Во врска со ова, НФУ во моментов подготвува официјален апел до „ Rosselkhoznadzor “ за да ја повика владината агенција да повлече одредени неоправдани ограничувања.
Извор: Агроклуб
