Ристе Димов од Пирава – валандовско, е професионален пожарникар, но во слободно време се занимава со земјоделско производство за дополнителен приход. Одгледува бостан, зелка и пченица.
Неодамна инвестираше во бушотина за да си го олесни наводнувањето на површините насадени со зелка.
-Најпрво имав бушотина од 12 метри рачно изработена, но поради големите суши нивото е намалено.Секоја година садам зелка на различна површина во зависност од квалитетот на семето кое го набавуваме. Иако секоја година цената е повисока на семето квалитетот е полош. На пример оваа година пуштивме семе за 7 декара (25.000 семки) добивме расад за 3 декара.
Во врска со бушотината тоа е моја инвестиција се надевам исплатлива. Цената на бушотината варира во зависност од многу фактори почнувајќи од 50 евра за метар па нагоре. Моравме да инвестираме во бушотини, бидејќи имаме систем за наводнување “Вардарска долина” кој во време на изградба ветуваше функционирање од 24/7, но моментално не функционира ниту 24 часа во една седмица. Изговор за тоа е недоволен број пријавени вадачи, а ние имаме насади на своите ниви. Принудени сме да инвестираме огромни суми за бушотини од сопствен џеб да извадиме производство кое може нема да ни ги врати ни парите за семенски материјал, а да не зборуваме за ѓубрива,пестициди, вода, нафта….вели Димов.
За важноста на наводнувањето во земјоделското производство е повеќе од јасно, но Димов вели дека тоа е само еден дел од целата состојба во земјоделството која не е добра и треба да се превземат мерки со кои ќе им се помогне на земјоделците, особено младите кои се помалку сакаат да се занимаваат со земјоделско прозводство.
-Крајно време е да се согледаат проблемите на земјоделците. Да се превземаат мерки со кои ќе се потикнат младите да работат земјоделие, да се финансираат одредени средства за бушотини и да се загарантира цената на производството. Бидејќи млади кои работиме со земјоделие преминуваме во ендемски вид – вели Димов.
Според најавите на МЗШВ мерки наменети за поддршка на младите земјоделци се планираат во програмата за следната година.
