Во февруари 2022 година, Комунистичката партија на Кина објави „документ број 1“ кој се занимава со регенерација на руралните средини, претставува пресвртница за одгледувањето житни култури во оваа земја и дава конкретни насоки на развој и нивниот распоред.
Нивната земјоделска политика вклучува ревитализација на руралните средини, а имаат за цел да постигнат стабилизација и зголемување на земјоделското производство, континуирано зголемување на приходите на земјоделците и обезбедување стабилност во нивните рурални средини, наведува Фармер.
Во јануари, Министерството за земјоделство донесе административни прописи во врска со проценката на безбедноста на ГМО во земјоделството и регистрацијата на сортите на главните култури. Конфликтот во Украина го забрза спроведувањето на планираните процеси на регенерација.
Минатата година вкупната обработена површина изнесувала 117.631.500 хa, а според податоците на Централниот завод за статистика, во 2021 година се собрани 682,85 милиони тони житни култури, што е за 13,36 милиони тони повеќе од 2020 година. Годинава се очекува жетвата да се зголеми за два до три проценти на годишно ниво.
Заштита на обработуваното земјиште
Поради географски услови, во оваа земја нема доволно земјоделско земјиште, поради што во овој документ е воведен посебен правен статус за обработливите површини за негова заштита.
Од вкупната површина од 120 милиони хектари, 96 милиони хектари добија статус на „трајно заштитени“ и забрането е да се користат за други цели освен за земјоделство.
Приоритет е даден на мелиорацијата и се планира изградба на 26,68 милиони хектари ефикасни системи за наводнување. Владата планира да ја зголеми површината за 6,67 милиони хектари обработливо земјиште со висок стандард во 2022 година, а до 2030 година планира да создаде 80 милиони хектари квалитетно земјиште.
Стабилен пазар
Годинава кинескиот пазар на житарки е релативно стабилен, што е резултат на соодветните залихи и успешната жетва минатата година. Кога ќе ги споредиме истите периоди во 2021 и 2022 година, може да се види дека цената на пченицата се зголемила, но тој пораст бил незначителен.
Документот бр. 1 има за цел да ги задржи цените на такво ниво и да им обезбеди на земјоделците профитабилност при откупот, но во исто време да не предизвика нарушување на трошоците на преработувачите. Владата во Кина не воведе регулација на цените, но спроведува механизам за финансиска поддршка, вклучувајќи осигурување на посевите, трошоци за сеидба, организација на откуп, складирање и транспорт. Фокусот е и на примената на информатичките и телекомуникациските технологии, вклучително и 5G, особено во тргувањето на пазарот со фјучерси.
Увоз и побарувачка
Според податоците на Општата царинска управа GACC, нема поголема промена во обемот на увозот. Стабилноста на цените на пченицата, пченката и сојата укажува дека конфликтот во Украина и ситуацијата на светскиот пазар немаат значително влијание врз Кина. Точните податоци ќе бидат достапни во мај оваа година.
На 23 февруари годинава GACC дозволи увоз на пченица од Русија. Каква ќе биде состојбата во наредниот период ќе може да се оцени дури оваа есен, по жетвата и анализата на податоците за увозот. Структурата на побарувачката ќе се промени во зависност од напредокот во модернизацијата на сточарството (главно свињи и живина) и очекувањата на потрошувачите.
