Цената на дизел горивото на бензинските пумпи во Германија достигна рекордни 1,555 евра за литар, пренесува Билд.
Во националниот дневен просек во неделата, цената била 1,555 евра за литар (95,93 денари/литар), објави ADAC. Ова малку го надмина претходниот рекорд од 1,554 евра за литар, на крајот на август 2012 година.
Ниту бензинот не заостанува многу. Во неделата, се продаваше за 1,667 евра за литар (102,84 денари/литар). Тоа значи дека само 4,2 центи го делат од рекордот од септември 2012 година од 1,709 евра.
Цените на горивата се зголемуваат со месеци, а главниот двигател е зголемената побарувачка поради економското закрепнување по првите бранови на корона, што во комбинација со недоволната понуда предизвика раст на цените на нафтата.
На цената на дизелот влијаеше и данокот на СО2
Во случајот на дизелот, додава ADAC, порастот дополнително беше поттикнат од високата побарувачка за нафта за греење пред зимата, како и данокот на јаглерод диоксид од 25 евра по тон, што резултираше со дополнителна такса.
Зголемувањето на цените предизвикува и политички дебати, па министерот за транспорт во заминување Андреас Шојер неодамна повика на подготовка на ефективни контрамерки во случај на натамошно нагло зголемување на цените на енергијата и горивото.
Голем дел од цената на горивото на германските бензински пумпи ја сочинуваат даноци и такси. Во случај на дизелот, на сегашното ниво на цените тоа е околу 25 центи ДДВ, 47 центи данок и од 6 до 8 центи данок за јаглерод диоксид.
