Едукативниот центар на Јадрената група на пчелари од брегалничкиот регион (ЈГПБР) „Меден исток“ ќе спроведе четиримесечна обука за лица почетници во рамки на програмата „Пчелар за основно пчеларство на одржлив начин“.
Програмата е верифицирана од јавната установа Центар за образование на возрасни и од Министерството за образование и наука, со што секој учесник кој успешно ќе ја заврши обуката ќе се стекне со национално признаен сертификат.
– Пријавувањето на заинтересираните полнолетни кандидати е до 24 јануари, а обуката ќе почне во февруари. Оваа програма за одржливо пчеларство е единствена во нашата држава, при што се користат швајцарските знаења и искуства, адаптирани на македонските услови што веќе ги применуваат членовите на „Меден исток“. По завршување на обуката учесниците ќе бидат оспособени за подигање сопствен пчеларник, за размножување на пчелните семејства, а ќе можат и да ги собираат, складираат и пакуваат пчелните производи, да применуваат стандарди и контрола на производството, како и да ги препознаваат болестите кај пчелите и да применуваат биотехнички методи за лекување, истакна Ванчо Кировски, претседател на ЈГПБР „Меден исток“.
Обуката ќе се реализира во викенд денови со вкупно 110 часови, распределени во седум тематски модули. Теоретските предавања ќе бидат во Кочани, во простории со потребни нагледни едукативни средства, а практичната настава ќе се реализира на пчеларник во близина на вештачкото езеро Гратче кај Кочани.
Програмата се реализира во соработка со Националната федерација на фармери, Шведската организација за развој We effect и Шведската агенција за меѓународна развојна соработка (СИДА), кои покриваат половина од трошоците за посета на обуката за секој учесник.
Согласно Законот за образование на возрасните сите учесници во програмата потпишуваат договор за следење на програмата со сите пропишани законски услови и примена на заштита од ковид пандемијата.
Извор: МИА
