За некои тие се угостители аматери, а за други се земјоделци кои покрај земјоделството сакаат да се занимаваат и со туризам!
Многу често руралниот туризам се спомнува како една од добрите опции за семејна и демографска ревитализација на нашата држава но за жал во споредба со другите земји, особено оние кои се членки на ЕУ се гледа дека кај нас овој дел е некако запоставен и дека на тоа треба да се обрне сериозно внимание.
За добрите познавачи на состојбите јасно е кои земји од Европската Унија ја имаат таа најразвиена форма на туризам. Тоа се Австрија, Германија, Велика Британија, Франција и Италија. Поради поддршката на европските фондови во развој на руралните подрачја таа форма на туризам доби експанзија и во Бугарија, Романија и Латвија.
Руралниот туризам подразбира широк спектар и тоа: селски туризам, велосипедизам, верски, ловен и риболовен, еколошки туризам и сл. Но кога се мисли на рурален туризам најчесто се спомнува агротуризам т.е селскиот туризам. Советот на Европа овој поим го дефинираше уште во 1986 година но кај нас неговиот развој се одвива бавно, со одредена доза на интерес на земјоделски туристички стопанства и се очекува во наредниот период тој да оди во нагорна линија.
Развојот на руралниот туризам е предмет на политика на многу европски земји со цел унапредување на глобалниот општествен и економски развој на руралните подрачја кои воглавно се сретнуваат со негативните трендови на иселување. Притоа развојот на руралниот туризам го поттикнува планот на Европската Унија која настојува да ги поттикне локалните и малите стопанства со цел развој на органско и европско земјоделство, кое има долгорочна и глобална цел – намалување на влијаниеето на климатските промени.
Неодамна министерот за земјоделство Трајан Димковски, изјави дека со ефикасно искористување на мерките од Програмата за рурален развој, наменети за општините ќе се решат проблемите со комуналната и патната инфраструктура во руралните општини.
Македонија има многу убави места кои можат да привлечат туристи во руралните подрачја, но за жал се посетуваат само за време на празници или прослави за Нова година. Единственоста на пристапот кон традиционалните производи кај нашиот народ е добар основ за создавање концепт за развој на Руралниот туризам во Македонија. Согласно направените анализи, нашата земја по својата географска и демографска структура нуди можности за развој на рурален туризам на поголем дел од својата територија. Крива Паланка и околината како дел од североисточниот плански регион има одлични услови за развој на оваа гранка. Промоцијата на дестинацијата треба да биде насочена кон домашните потенцијални туристи и тоа особено кон викенд туристите, од главниот град Скопје и од Република Бугарија. Препорачливо е користење на интернет промотивни алатки и промотивни печатени материјали, а промоцијата треба да се одвива во насока на организирање на еднодневни тури.
Долго време се спомнува руралната средина како носител на туристичкиот потенцијал во земјава. Не е голем бројот на посакувани туристи кои би престојувале во рурална средина. Секојдневниот стрес, еколошките проблеми и претрупаната градска средина им даваат можност на луѓето да направат споредба помеѓу сивото секојдневие и престојот во уникатна рурална средина, да се проба свежа и еколошки чиста храна, поблиски контакти со локалното население, приближување до природните убавини и реткости, селската градина, двор.
Според директорот на Агенцијата за финансиска поддршка во земјоделството и руралниот развој, Николче Бабовски преку Програмата за рурален развој се трудат да создадат еднакви услови за развој на сите региони на државата и со посебен акцент на руралните подрачја.
