Овоштарите во Србија речиси ја завршија бербата на раните сорти „гала“ јаболка и годинашните плодови веќе почнаа да излегуваат на странските пазари.
„Годинава ќе имаме околу 450.000 тони јаболка, што е за приближно 15 отсто помалку од лани“, изјави експертот за овошје проф. д-р Зоран Кесеровиќ пред почетокот на овогодинешната берба.
„Минатата година јаболка имаше околу 513.000 тони, а годинава на пониските приноси повеќе влијаеше пролетниот мраз отколку високите дневни температури и сушата. Мразот најмногу им наштети на сортите Ајдаред, Црвен Делишес и Грени Смит.“, рече проф. д-р Кесеровиќ.
„Со пласманот на раните сорти „гала“, овоштарите се задоволни бидејќи речиси целиот род е продаден во Велика Британија, Обединетите Арапски Емирати и Русија. Со Гала е направена добра извозна зделка, но тоа е само една сорта на јаболка, а потоа следува берба на други сорти и склучување договори за нови извозни аранжмани, па останува да почекаме и да видиме со што ќе се соочат овоштарите на патот. Искуството од минатата година покажува дека овоштарите кои навреме ги продале јаболката, до крајот на мај, поминале подобро од оние кои ја чувале реколтата за летните месеци. На крајот немаа купувачи, па беа принудени да продаваат јаболка за преработка, каде што цената е пониска, а со тоа останаа без профит“, вели Андреј Станаревиќ од компанијата „Полино аграр“.
Тој нагласува дека ќе има и други потешкотии во пласманот на јаболката.
-Оваа година ќе имаме помалку јаболка од минатата, но повеќе ќе има во Полска, која е најголем производител на ова овошје во ЕУ, потоа и во Италија и Франција, така што тоа ќе влијае и на пласманот на оваа домашна култура на странските пазари – рече тој.
Според професорот Кесеровиќ, килограм „гала“ јаболка на големо кога се извезува чини од 70 до 80 евроценти, а на домашниот пазар цената се движи од 40 до 50 динари.
„Поради високите трошоци за транспорт, најважно е домашните јаболка „гала“, како и другите сорти на јаболка да имаат купувачи на странските пазари и да се барани надвор од нашата држава. Енергијата значително поскапе и на овоштарите им е подеднакво тешко да ја усогласат големопродажната цена на јаболката со транспортот и да ги платат зголемените трошоци за чување на јаболката во ладилници.“, рече проф. д-р Кесеровиќ, пренесува српски Дневник.
