Според специјализираниот портал „European Supermarket Magazine“, со седиште во ирскиот главен град Даблин, интересот на „Лидл“ за отворање супермаркет во земјава следи откако неговата продавница отворена во јануари во Врање, привлече голем број купувачи од Северна Македонија, но и од Косово.
Ова се случи откако Србија ги отвори границите за Северна Македонија без тест за коронавирус, а голем број македонски граѓани отидоа во Врање за време на викендите, при што „шопингот“ во маркетот „Лидл“ не изостанал, а за некои и главен мотив да се појде. Токму ова беше и предмет на критики, затоа што пандемијата се уште трае, и, иако Србија ги има сите постоечки вакцини, сепак, ширењето на вирусот се уште не е ставено под контрола.
По влегувањето на пазарот во Словенија, Хрватска и Србија, германскиот трговски синџир „Лидл“ ќе го отвори својот прв супермаркет и во Северна Македонија, објави порталот.
Според ESM, германската компанија минатиот месец регистрирала своја подружница во земјава под името „Lidl North Macedonia“, која ќе биде под надлежност на бугарскиот огранок на „Лидл“ и со неа ќе раководат Милена Драгијска, Бисер Инчовски и Љубомир Хрсев.
Предвидено е „Лидл“ на стартот да инвестира 500.000 евра во земјава.
